Iindaba

Abhengeziwe amagama abo barhaneleka kwityala lokudubula uLali!

Abongile Ginya|Published

Bashiyeke ngaphakathi eziseleni abarhanelwa abathathu abajongene netyala lokubulawa kukaXoliseka Lali obenguMbhexeshi waseMalahleni Local Municipality.

Image: IOL

Bashiyeke ngaphakathi eziseleni abarhanelwa abathathu abajongene nezityholo zokubulala owayesakuba nguMbhexeshi kwibhunga likaMasipala waseMalahleni uXoliseka Lali.

Abarhanewa bavele kusasa ngoLwesithathu phambi koMantyi waseKomani nalapho ityala labo limiselwe umhla wesithandathu (6) kwiveki ezayo neza kube iyinyanga yeThupha.

Abarhanelwa nguBavuyise Mdingi (37), Mvuzo Mafana (41) kwakunye noSonwabiso Siko (43) nekulindeleke ukuba bafake isicelo sebheyile kwiveki ezayo.

ULali ubhaqwe edutyulwe egumbini lakhe ngoMvulo weveki ephelileyo akuba engafumaneki emnxebeni wakhe.

IANC eMpuma Koloni kwimbalelwano yayo income amaPolisa ngomsebenzi okhawulezileyo wokubanjwa kwabarhanelwa. Ithi okona kuyothusayo kukuba kukho neGosa eliPhezulu loMasipala iEmalahleni kwesi sithathu sabarhanelwa. Ithi ibongoza abomthetho bekunye neNPA basebenzisane ukuqinisekisa ukuba ababuleleyo bayagwetywa.

NgoLwesithathu bekubanjwe inkonzo yesikhumbuzo kaLali kwiholo laseMtsheko.

UBrigadier Nobuntu Gantana uthi uphando lusaqhuba malunga neli tyala. Uhlaba ikhwelo eluntwini esithi mabohlukane nokunwenwisa amarhe, kwaye iinkcukacha ziza kuvezwa kangangoko.