Bamise iintente ePitoli abaqhankqalazi abasuka eNgcobo
Abaqhankqalazi baseNgcobo abamise iintente phambi kweZakhiwo zoMdibaniso ePitoli.
Image: Uthunyelwe
Abafikanga bagalelekile ePitoli abahlali abangamashumi amabini anesibini abasuka kwiilali ezingqonge uMasipala iDr AB Xuma eNgcobo, bezocela uMongameli uCyril Ramaphosa ukuba angenelele kwiingxaki zabo.
Ziintsuku ngoku, belele kwiintente ezimiswe ngaphandle kwamasango eZakhiwo zoMdibaniso, bekhalazela ukungabikho kweenkonzo nobuqhophololo kulo Masipala.
"Sincame amakhaya neentsapho zethu ukuba size kuvakalisa inkxalabo yethu malunga nemeko kuMasipala waseDr AB Xuma ozinze eNgcobo ukusukela oko sakhululekayo ngo1994," kubalise utat' uVakutshiwo Gigi (70) wakwilali iMnyolo ngaseNgcobo.
"Akhonto intle eyenziwayo, imali yehliswa ngemilenze ngabaphetheyo, thina sishiyeka singenanto, akukho manzi, sisela amanzi amdaka nemfuyo."
Bakwiintente ezintathu abazimise ngaphandle kwamabala eZakhiwo zoMdibaniso ukusukela oko bagxothwayo ngamapolisa.
Abaqhankqalazi baseNgcobo bamise iintente phambi kweZakhiwo zoMdibaniso ePitoli bekhalazela imeko yoMasipala waseDR AB Xuma.
Image: Uthunyelwe
Batyhola abasemagunyeni ngokungahoyi xa bekhalazela ubuqhophololo obugqithisileyo, ubusela, ukubiwa kwemali yeenkonzo ngoosomashishini abasebenza nabaphathi bakaMaspala.
"Siye sagxothwa ngamapolisa alapha, ngoku silapha ngaphandle kweZakhiwo zoMdibaniso asonanga mntu," kutsho utat' uLindela Sikondo (63) wakwilali iDeberha.
INgcobo yidolophu apho engundabamlonyeni, eneziganeko zolwaphulomthetho, nomgangatho ophantsi weenkonzo ezisiwa ebantwini ngamaziko karhulumente aphetheyo.
"Le asiyompilo ebesiyinqwenela ukusukela ngo1994, azikho iindlela, iibhulorho ebekumele ukuba kudala zagqitywa zashiywa zingagqitywanga, siyasokola gqithi," kutsho utat' uAnele Sontshantsha (52) ongomnye wabo bashiye imizi yabo behlutshwa kukucotha kweenkonzo eNgcobo.
NgoLwesihlanu, umhla wokuqala kweyeThupha, badibene negqiza elithunyelwe liSebe leNtsebenziswano kuRhulumento neMicimbi yezeMveli (Cogta).
Omnye wamadoda akwaCogta akavumanga ukuthetha ngencoko abenayo nabahlali, esithi akagunyaziswanga ukuba athethe neentatheli kuba umphathi wabo sele emkile kwaye kusafuneka bathethe noMphathiswa uVelenkosini Hlabisa kuqala.
Baza kuhlala kwezi ntente de bafumane iimpendulo kurhulumente nakuMongameli Ramaphosa, utshilo uGigi.