Iindaba

Uhlengahlengiso lwamaxabiso amafutha

Cwayita Nondula|Published

Amaxabiso amafutha aza kuhlengahlengiswa kule nyanga yeThupha.

Image: Karen Sandison / Independent Media

Amaxabiso amafutha aza kuhlengahlengiswa ukuqala ngoLwesithathu we6 kweyeThupha 2025. Amaxabiso eentlobo ezahlukeneyo zepetroli aza kuhla, ngelixa ixabiso ledizili neparafini liza kunyuka.

UMphathiswa wezeZimbiwa uGwede Mantashe ubhengeze uhlengahlengiso lwamafutha olusekwe kwimiba ekhoyo ngoku yalapha ekhaya nakwihlabathi jikelele.

Ezinye zezona zizathu ziphambili zohlengahlengiso lwamafutha ngamaxabiso eoyile ekrwada, amaxabiso epetroli kumazwe ngamazwe kunye notshintshiselwano lwerandi nedola.

"Umyinge wexabiso leoyile ekrwada yebrent yehle kancinci ukusuka kwi69.36 yeedola zaseMelika (USD) ukuya kwi69.06 USD ngeli xesha liphantsi kovavanyo.

"Eyona nto inegalelo kwixabiso elisezantsi leoyile ekrwada sisigqibo seOPEC sokunyusa imveliso kunye nokungaqiniseki okubangelwa yirhafu ezayo yorhwebo yaseMelika kubandakanywa neerhafu zesibini (secondary tarrifs) ezinokuchaphazela ukukhula koqoqosho lwehlabathi kunye nemfuno yeoli ekrwada," litshilo iSebe lezeZimbiwa kwingxelo.

ISebe lithi umyinge wamaxabiso epetroli kumazwe ngamazwe wehlile ngokuhambelana nokuhla kwamaxabiso eoyile ekrwada. Ithi amaxabiso edizili neparafini anyukile ngenxa yokuhla kwesitokhwe eMelika, ukuvalwa kwemizi mveliso yamafutha ngokungacwangciswanga kunye nokuvalwa kwemizi mveliso yamafutha kwiManyano yaseYurophu okubangele ukunqongophala kobonelelo.

Le yindlela amaxabiso amafutha aza kufumana uhlengahlengiso kule nyanga yeThupha ka2025:

  • Petrol 93 (ULP & LRP): Yehle ngama28 ilitha nganye (28.00 c/l).
  • Petrol 95 (ULP &LRP): Yehle ngama28 ilitha nganye (28.00 c/l).
  • Diesel (0.05% sulphur): Yenyuke ngama65 ilitha nganye (65.00 c/l).
  • Diesel (0.005% sulphur): Yenyuke ngama63 ilitha nganye (63.00 c/l).
  • Illuminating Paraffin (wholesale): Yenyuke ngama32 ilitha nganye (32.00 c/l).
  • SMNRP for IP: Yenyuke ngama43 eesenti ilitha nganye (43.00 c/l).
  • Maximum Retail Price of LPGas: Yehle ngama69 eesenti ngekhilogram nganye (69.00 c/kg) kwaye yehle ngama78 eesenti ngekhilogram nganye (78.00 c/kg) eNtshona Koloni.