Iindaba

Kuse kudutyulwe kwabulawa isine sabantu eBhayi

Abongile Ginya|Published

Kuphandwa ngeziganeko ezibini zokudutyulwa kwabantu abane ngorhatya lwayizolo eNew Brighton eBhayi.

Image: IOL

Amapolisa aseNew Brighton aphanda ngeziganeko ezibini zokudubula ezenzeke ngorhatya lwangoLwesine nalapho abantu abane (4) baphulukene nobomi babo, amadoda amathathu kunye nowasetyhini omnye.

Ingxelo ephuma kuBrigadier Nobuntu Gantana ithi, isiganeko sokuqala senzeke ngentsimbi yesixhenxe ngorhatya kwisitalato iNikiwe eNew Brighton, nalapho amaxhoba amathathu, amadoda amabini kunye nomnye obhinqileyo nabaphakathi kweminyaka engama37 ukuya kuma43 ubudala, adutyulwe abulawa ngamadoda amabini angaziwayo athe angena adubula.

Amaxhoba aye abalekiselwa esibhedlele kwangoko naye abhengezwa njengabhubhileyo ngenxa yamanxeba amaninzi okudutyulwa.

Kwesesibini isiganeko, kwangorhatya lwayizolo uLwesine kwaseNew Brighton, kudutyulwe indoda (52) ebihleli kwimoto yayo kwisitalato iTshiwula nethe yabhubha kwangoko kwindawo leyo yexhwayelo.

AmaPolisa avule amatyala amabini okubulala. Abongoza nabani na onokuncedisana namaPolisa malunga nezi ziganeko atsalele ku08600 10111 kungenjalo batyelele kwisikhululo esikufutshane.