Iindaba

iSAHRC iqalise uphando ngoMcKenzie

Cwayita Nondula|Published

ISAHRC iqalise uphando emva kwezikhalazo zoluntu ezifumeneyo kulandela izinto zobuhlanga ezibhalwe nguGayton McKenzie phakathi konyaka ka2011 no2017.

Image: BackpagePix

IKomishini yamaLungelo oLuntu eMzantsi Afrika (SAHRC) ibhengeze ukuba ivule uphando kulandela izikhalazo zemibutho yezopolitiko nabantu malunga nezinto zobuhlanga ezabhalwa kumakhasi onxibelelwano phakathi konyaka ka2011 ukuya ku2017 nguMphathiswa wezeMidlalo ubuGcisa neNkcubeko uGayton McKenzie.

Oku kuza emva kokuba ezi zinto zibhalwe nguMphathiswa uMcKenzie nokwayinkokeli yePatriotic Alliance kwiminyaka eyadlulayo ziphinde zavela kwimpelaveki ephelileyo, ngethuba ebegxeka iOpen Chats Podcasts ngeentetho ezikhubekisayo ngabantu bebala.

IKomishoni ithe izinto ezibhalwe nguMcKenzie ziphula imimiselo yomthetho okhuthaza ukulingana iPromotion of Equality and Prevention of Unfair Discrimination Act (Equality Act), 2000.

"Ngenxa yoko, iKomishoni ithumele ileta yesityholo kuMphathiswa uMcKenzie. Emva koko, iKomishoni iya kumisela eyona ndlela ingcono eya phambili enokuthi ibandakanye ukusungula iinkqubo kwiNkundla kaMasilingane (Equity Court) ngokweCandelo 13(3)(b) loMthetho weKomishoni yamaLungelo oLuntu eMzantsi Afrika wama40 ka2013 (uMthetho weSAHRC), ufundwe kunye neCandelo lama20 loMthetho kaMasilingane, ka2000," ithsilo iSAHRC.

IKomishoni ithe ngenxa yesikhundla sakhe, uMcKenzie kulindeleke ukuba ahambelane nemigangatho yokuziphatha ehamba nokuba nguMphathiswa kunye nelungu lePalamente.

IKomishoni ikwakhumbuze abantu ukuba inkululeko yokuthetha nantoni ayithethi ukuba umntu makathethe unothanda. Ithe intetho yentiyo ayivumelekanga ngokomthetho iEquity Act nomthetho iPrevention and Combating of Hate Speech Act, 2023. Le Komishoni imemelele abantu ukuba bathobele imigaqo equlethwe kumgaqo-siseko, kuquka isidima somntu, ukulingana nokungacaluli.