iANC iza kuthatha amanyathelo ngakuGigaba noMchunu

Umbutho weAfrican National Congress (ANC) udize ukuba uza kuthatha amanyathelo ukusabela kwindlela yokuziphatha mva nje kwaneentetho zikaMalusi Gigaba kunye noSenzo Mchunu.

Kwingxelo ekhutshwe ngobusuku bangoMvulo, uMahlengi Bhengu, isithethi seANC kuzwelonke, uthe. "La maqabane enze [iintetho] ngaphandle kwalo naliphi na igunya lombutho okanye isigqeba esenza izibhengezo ngendlela ebonisa ukujongela phantsi iANC. Akufunekanga kubekho mathandabuzo ukuba siyazikhaba izimvo zalo naliphi na iqela langaphakathi lombutho kwaye ezi zimvo kufuneka zithathwe njengohlaselo lwegama, ukuthembeka, kunye nomanyano lweAfrican National Congress."

Ngokombutho, izenzo zabo zibonisa ukunyhashwa kwemigaqo yonxibelelwano lwangaphakathi kwiANC kwaye zijongela phantsi imfundiso esisiseko yalo mbutho.

Oku kuza emva kokuba uGigaba ethe iANC "iza kuba yimbali" ukuba ayiphumeleli koomasipala kunyulo loomasipala. Ebethetha ngethuba kutyhilwa ilitye legqala lomzabalazo elingasekhoyo uNokuhamba Nyawo eMachobeni, eNgwavuma, kumantla KwaZulu-Natal.

"Ndicinga ukuba sixakeke kwiikona zethu ezincinci, namaqelana ethu. Akukho kubonakala ngathi kukho ithuba lokuba siphakame kula maqelana, ukuze sixoxe ngeyona nto ilungele ilizwe lethu, umbutho wethu, abantu bethu, ukuze sifezekise uluntu lwasemva kobukoloniyali. Kwaye de sikulungele ukwenza loo nto, ndicinga ukuba siyasilela," utshilo uGigaba.

Lo mbutho uzigxininise "njengombutho wenguqu" okhokelwa yimithetho-siseko yentando yesininzi kunye neziseko zawo zokuziphatha zangaphakathi.

"La maqabane agxeka ingqibelelo nomanyano lweANC, ewuchaza lo mbutho njengongenasidima nongafanelanga kuxhaswa ngamalungu awo. Iintetho zabo zibangela iyantlukwano nesiphithiphithi kwaye zenza buthathaka ukuzithemba kwabantu kumbutho wabo. Akukho qabane liqeqeshekileyo linokuthi ngokwentando yalo, lenze iintetho eziqinisa [okanye ezinika amandla] imibutho ekudala ifuna ukubuyisela umva impumelelo yenguquko yethu," utshilo uBhengu.

Umbutho ukwaqaqambise ukophulwa kwemigaqo yonxibelelwano esekiweyo. Ikwagxininise ukuba unxibelelwano kwiANC ligunya lomgaqo-siseko likaNobhala Jikelele, kwaye la magunya aphathiswe nesithethi sikazwelonke.

Ukusabela koku, iANC iqinisekise ukuba iza kuthatha amanyathelo afanelekileyo ukulungisa le ndlela yokuziphatha, igxininisa ukuba "akukho qabane liya kungajongani noluleko lombutho."