Utitshalakazi ufunyenwe enetyala lokubulala umntwana wesithandwa sakhe
UAmber Lee Hughes ongutitshalakazi ufunyenwe enetyala lokubulala umntwana oyintombazana wesithandwa sakhe.
Image: Itumeleng English/ Independent Newspapers
Utitshalakazi oneminyaka engamashumi amabini anesihlanu (25) ubudala ugwetyelwe ityala lokubulala ngokucetyiweyo kunye nokudlwengula umfundi oyintombazana oneminyaka emine ubudala nokwangumntwana wesithandwa sakhe, uNada-Jane Challita.
Isigwebo ngakuAmber Lee Hughes sinikezelwe ngoLwesine kwiNkundla ePhakamileyo yaseGauteng eGoli.
UHughes wabanjwa emva kokuba umzimba kaNada-Jane Challita wafunyanwa udada kwibhafu enamanzi kwikhaya lakhe laseGlenvista kweyoMqungu ka2023.
Waqala ukuthandana notata wale ntwazana ngo2021 waza wayokuhlala nabo. Ngethuba lokuhlala kwakhe nabo, ubudlelwane babo kuthiwa buphawulwe ngokuxabana rhoqo.
Umtyholwa kutyholwa ngokugrogrisa ngokumenzakalisa umntwana ngexesha leengxabano zabo, sitshilo isithethi seGunyabantu lezoTshutshiso eGauteng, uPhindi Mjonondwane.
I-NPA ithi ngomhla wesiganeko, utata washiya intombi yakhe noHughes, waza wamdlwengula umntwana ngokumfaka into engaziwayo kumalungu akhe angasese.
"Kukwathiwa wamntywilisa waze wamsika izihlahla zozibini. Umzimba womntwana wafunyanwa udada ebhafini," utshilo uMjonondwane.
Wongeze ngelithi uHughes waqala waliphika ityala, nto leyo eyabangela ukuba umbuso uveze ubungqina obubonisa ukuba unetyala ngaphandle kwamathandabuzo.
"Emva kokuva amacala omabini kunye neengxoxo zokuvala, uHughes wafaka ingxelo yolwamkelo eyongezelelweyo, evuma ukuba warhaxa umntwana emva kwengxabano noyise womntwana ngenxa yokukrexeza kwakhe.
"Ubalule ingxaki yakhe yokuba neBorderline personality kodwa wavuma ukuba uyazi ngokupheleleyo izenzo zakhe, echaza iinzame ezininzi zokuzibulala ezingaphumelelanga emva koko. Nangona kunjalo, uyazikhanyela izityholo zodlwengulo, esithi akayazi indlela umntwana awafumana ngayo ukwenzakala kwilungu langasese," wongeze watsho uMjonondwane.
Kwizityholo zodlwengulo, inkundla yagweba ngelithi umbuso wasilela ukubonisa ubungqina bokuba umntwana umoshwe ezimpundu kodwa wafumana ubungqina obaneleyo bodlwengulo kuba emoshwe ngaphambili, kwilungu langasese.
"Ubungqina bukagqirha baqinisekisa inxeba elitsha kwindawo yangasese yomntwana, ebonisa ukufakwa kwento encinci, imizuzu ukuya kwiiyure ngaphambi kokubhubha komntwana. Inkundla yabona ingqina eliyingcali lithembekile kwaye, ngenxa yokuvuma kukaHughes ukuba wayeyedwa nomntwana ngexesha lokubhubha, yagqiba ekubeni nguye obangele ukwenzakala, yamgwebela ityala lokudlwengula," utshilo uMjonondwane.
Ityala lihlehliselwe umhla wama27 kweyeDwarha 2025, ukulungiselela iinkqubo zaphambi kwesigwebo, kubandakanywa inkqubo yokumisela isohlwayo somtyholwa.