iMK Party igxeka uRamaphosa neGNU ngobundlobongela eCape Flats

Umbutho weMK Party ugxeke uMongameli uCyril Ramaphosa norhulumente weGNU, ubatyhola ngokungawuhoyi ummandla weCape Flats xa kuthethwa ngobundlobongela.

Kwingxelo ekhutshwe ngoLwesithathu, lo mbutho ukhalimele ukubulawa kwabantu okugqugqisayo, utyhola ukuba lo mmandla "ujikwe wayindawo yokuxhela ngelixa uRamaphosa neGNU belahla abantu."

Isithethi salo mbutho uNhlamulo Ndhlela uzobe umfanekiso ombi wale ngxaki.

"Ukusuka eMitchell’s Plain ukuya eManenberg, ukusuka eLavender Hill ukuya eDelft naseKhayelitsha, igazi lichiphiza ezitratweni mihla le. Amadoda, abasetyhini, abantwana, neentsana ziyadutyulwa emini, kumagumbi okufundela, ezinkundleni, nangaphandle kwezikhululo zamapolisa."

Utyhole ngelithi iCape Flats intshwila kubundlobongela, urhulumente ejongile "phantsi kokhuseleko lwezakhiwo zabo ePitoli."

UNdhlela ukugxekile ukwenziwa kwesiqhelo ukubulawa kwabantu, esithi "lelona tyala libi likaMongameli Ramaphosa norhulumente wakhe," watsho esithi ukubhubha kwabantu yinto eqhubeka oko kwaye asiyonto enikeza umdla ukuze ivezwe nasenzindabeni.

Umbutho ugxeke impendulo karhulumente njengemathileyo nengenankathalo, echaza indlela amagosa "angathathi uxanduva ngayo" ngelixa amaqela oonqevu eqhubeka nokugrogrisa uluntu.

"Amapolisa azimela ngesizathu sobuvila sokuba ukubulala 'kunxulumene namaqela oonqevu,' kodwa into ecace gca kukuba abantu abamsulwa bayachaphazeleka," utshilo uNdhlela.

Iqaqambisa ukusilela kukarhulumente, iMK Party ithe abantu abatsha, abahluphekayo, kunye nabahlali abaphangelayo baseCape Flats "bagwetyelwe ukuphila baze babhubhe ngoloyiko," bengcatshwe ziinkokeli ezizikhuselayo kuphela.

"Urhulumente uphulukene nolawulo kwiCape Flats. Abashishina ngokuthengisa iziyobisi kunye neenkokeli zoonqevu balawula ngaphandle koHayi. Abazali bayoyika ukuhambisa abantwana babo ezikolweni.

UNdhlela uphinde wagxeka uMongameli Ramaphosa ngoko akuchaze njengokuthula nokungenzi nto, ebalula iindibano zakhe eziqhubayo kwihlabathi jikelele kwiinzame zokuzisa uxolo kumazwe angaphesheya, ngelixa engahoyi ubundlobongela basekhaya.

"Akakhange akhuphe nelizwi lovelwano, akakhange atyelele nosapho olunye oluzilileyo, ukuthula kwakhe asikobugwala nje, kukudelela."

Lo mbutho uthe udushe lusenokuphenjelelwa "bubumnyama," ekusenokwenzeka ukuba lubandakanya ubuntlola bamazwe angaphandle kunye "namanye amaqela aneempembelelo," utyhola iGNU ekhokelwa yiDA ngokutyeshela ngabom ezi zizathu.

"Abaqhathwa abantu bakuthi. Kukho inkolo ekhulayo nethethelelekayo yokuba uRamaphosa nendibanisela engekho semgangathweni ekhokelwa yiDA ukuthiwa yiGNU iwajongela phantsi abantu bebala eCape Flats, ebashiya bebhubha bengenakhuselo."

UNdhlela ukhumbuze uluntu ukuba uMongameli uJacob Zuma ubengowokugqibela ukutyelela iCape Flats kwaye athethathethane noluntu oluchatshazelwe lubundlobongela. Ukusukela ngoko, uthe, iqela elijongene nolwaphulomthetho iAnti-Gang Unit ayifumenanga inkxaso mali eyaneleyo ngabom kwaye yenziwa buthathaka.

"Le nto ibizwa ngokuba yiGNU inomdla omkhulu wokukhusela abantu abaphezulu kunokukhusela ubomi babantu abaqhelekileyo."

Lo mbutho ufunge ngelithi awuzukuthula xa kukho iziganeko eziqhubekayo zokubulala kwaye ufuna inyathelo likarhulumente ngokukhawuleza.

“Ukuba uRamaphosa uyala ukusebenzisa ilizwi lakhe, impembelelo, namagunya omgaqo-siseko ukuphelisa le nyhikityha, abantu baseCape Flats mabagqibe ngelithi urhulumente okhokelwa yiDA ekuthiwa yiGNU ubhengeze imfazwe kubo ngokungabakhathaleli.

"Ukuba kunjalo, abantu mabaziququzelele, bahlanganise kwaye balungiselele ukuzikhulula, kuba lo rhulumente sele ebashiyile," itshilo ingxelo.