Isakhono sokuthunga sibeka isonka etafileni kulutsha lwaseMakhanda olungaphangeliyo
AbeBill Kali Collective eseMakhanda banika izakhono zokuthunga kulutsha oludinga imisebenzi.
Image: UTHUNYELWE
Nangona nje idolophu yaseMakhanda iyenye yeendawo ezidume ngobugcisa kwilizwe jikelele, ukanti ikwayidolophu engundabamlonyeni ngokusilela kweenkonzo eziya eluntwini kuquka nezinga eliphezulu lentswela ngqwesho kulutsha, oosomashishini bala mmandla abaninzi abayekanga ukuputalaza ngokuphuhlisa kwanokuncedisana nolutsha.
Oku kuza emva kokuba ishishini lokuthunga laseMakhanda, iBill Kali Collective, kaSabelo Bill kwakunye noTandile Kalipa, besenza ngako konke ukuvula iminyango kulutsha olungaphangeliyo lwaseMakhanda ngokuthi babaqeqeshe kwishishini labo bebanika izakhono zokuthunga noluye luphela lukwazi ukuzimela ibengulowo abenelakhe ishishini.
IBill Kali Collective, nangona sele inethuba iqhuba, isanda kufumana inkxaso yezixhobo ezintsha zokuthunga ukukhulisa nangakumbi ishishini labo elincedisana nolu lutsha ngezakhono, ingakumbi abo banomdla wokuba kwicandelo lefashoni. Izixhobo izinikwe yiNOA Group’s Wind Garden eseMakhanda.
Bobabini abeBill Kali Collective, uSabelo kwakunye noThandile, banezidanga kwiFashion Design and Clothing Management kwiYunivesiti iCape Peninsula University of Technology neyaziwa njengeCPUT.
UThandile uthe: “Oku akuncedi kukhula kweshishini lethu qha, koko likwanika thina izixhobo zokususa kude abantu abatsha kwintswela ngqesho sibanike indlela yokuphila.”
UAngela Harrison, oyiSocio-Economic Development Manager weWind Garden, uthi beyile nkampani banethemba lokuba izixhobo ezi ziza kuncedisa kuqeqesho bekwaxhasa ekubeni kudaleke namathuba emisebenzi.