Ipolisa lidubule labulala abarhanelwa abathathu kudubulwano

Ipolisa elikwicandelo elijongene nothintelo lokubiwa kwemfuyo eOR Tambo lamkelwe ngemvula yeembumbulu kumzi othile ngamadoda amathathu ngethuba lisenza umsebenzi walo kuQumbu ngobusuku bangoLwesine nalapho liphendule ngeembumbulu zalo kwabhubha la madoda, lasinda lona.

Esi sehlo senzeke ngentsimbi yethoba ngobusuku bangoLwesine, umhla wesine kweyoMsintsi 2025, kwingingqi yaseMpehle, eMaladini, eSulenkama, kuQumbu.

Isithethi samapolisa uKapteni Welile Matyolo uthi eli qela lisebenza imini nobusuku kwiindawo ezixhaphake ngobusela bemfuyo ezifana naseBityi, kuTsolo, kuQumbu naseLibode.

"Eli polisa ladutyulwa ngamadoda amathathu axhobileyo aphakathi kweminyaka engama25 nama35 kurontawuli ngelixa lalikunye neqela lalo beqokelela iinkomo ezine ezibiweyo ezichongwe ngabanikazi bazo bezifaka kwiloli elayishayo.

"Inkomo yabalekela kumzi okufutshane nalapho eli polisa labuzisa ngale nkomo elahlekileyo kwindoda eyayiseyadini, le ndoda yabaleka yangena kurontawuli kwabe kusitsho izithonga ezivela kulo rontawuli kudutyulwa ipolise nelithe laziphindezela, ladubula labulala abarhanelwa abathathu abangamadoda ngaphakathi," usthilo uMatyolo.

Kwafunyanwa imipu yohlobo lwe9mm engenampephamvume (iinombolo zesiriyeli zicinyiwe) ngaphakathi kurontawuli. Kuphindwe kwafunyanwa kwezi zindlu iibhokhwe ezilithoba ekurhaneleka ukuba zibiwe zivalelwe etyotyombeni.

Bonke abachaphazelekayo kuqukwa neIndependent Police Investigative Unit (IPID) bonke baye babizelwa kwindawo yexhwayelo kwaza kwavulwa iidokethi zophando, ezichaza amatyala abekwa amadoda abhubhileyo, afana nokuzama ukubulala, ukuhlasela amapolisa, ukuba nemipu engavumelekanga kunye neembumbulu, kunye nemfuyo ekurhaneleka ukuba ibiwe.

I-IPID iza kuqhuba nomsebenzi wayo wokuphanda eli tyala ngakumbi, utshilo uMatyolo.

Uphando ngesi siganeko lusaqhuba kwaye ipolisa lisindile njengoko khange lonzakale.