Iindaba

Kugrogriswa iiloli eGqeberha

Cwayita Nondula|Published

Kugrogriswa iiloli eGqeberha liqela labantu elingonwabanga ngabantu bamazwe angaphandle abaqeshwa ziinkampani zeloli.

Image: Lalocracio/iStock

Amapolisa aseGqeberha athi azisiwe ngezityholo zogrogriso lokutshisa iiloli kuhola wendlela uR335 (Addo Road) ngomhla wesihlanu kweyoMsintsi ngo2025. Kutyholwa ngelithi oku kuza emva kokuba iqela labantu abathile lingonwabanga ngabaqhubi bamazwe angaphandle abasetyenziswa ziinkampani zeloli.

Isithethi samapolisa uKapteni Andre Beetge uthe iiloli ezininzi ziye zatyhola ngelithi zoyikiswa ukuba zingasebenzisi iiloli zazo nge5 kweyoMsintsi 2025 kungenjalo iiloli ziyakumiswa zitshiswe.

UMkomishinala wamaPolisa eNelson Mandela Bay, uMajor General Vuyisile Ncata, uphendule wathi: "Asinakuvumela uluntu oluthobela umthetho kunye namashishini ukuba agrogriswe ngolu hlobo ngokugrogriswa ngobundlobongela ukuze abophuli bomthetho benze ngendlela yabo."

"ISAPS kunye namahlakani ayo okhuseleko aza kutyalwa kwindawo echaphazelekayo ukunqanda naluphi na ubundlobongela obunokwenzeka, kunye nokuqinisekisa ukhuseleko lwabo bonke abaqhubi beemoto neeloli kwiindlela zethu zoluntu kummandla waseNelson Mandela Bay."

UMajor General Ncata uthe amapolisa ayakhuthaza kwaye abongoza naliphi na ishishini elithe lagrogriswa ngobundlobongela ukuba lize ngaphambili livule amatyala okugrogrisa ngakwabenzi bobubi.

"ISAPS ikwanqwenela ukulumkisa nabaphi na abenzi bobubi abasebenzisa izigrogriso ukuba kukho iindlela ezisemthethweni, ngaphandle kokusebenzisa ubundlobongela, ukusombulula imiba ebachaphazelayo, kwaye nabaphi na abaphuli mthetho abonakalisa impahla yabanye baza kujongana nengalo yomthetho," wongeze watsho.