Intwazana yaseKapa elahlekileyo uAnovuyo akakafumaneki

Iphulo lokukhangela umntwana oneminyaka esibhozo ubudala olahlekileyo eLotus River eKapa lingene kusuku lwesithathu.

Usapho kunye nabahlali basematyotyombeni aseRiemvasmaak baxhalabile njengoko uAnovuyo Oncke ngoku sele kuqengqeleke iintsuku engaziwa apho akhoyo.

Umsebenzi woluntu, uBeryl Williams, uthe akukabikho nto intsha kwaye ukukhangela le ntwazana kuyaqhubeka.

Kwagqogqwa kwindlu ngendlu kulo mmandla njengoko abahlali ngentando yabo bavulela abantu abakhangelayo amakhaya abo ukuze kugqogqwe.

Amapolisa ebekhokele kolu gqogqo, kwaye nezixhobo zobuchwepheshe bale mihla njengeeDrones zisetyenzisiwe nazo ukuze zincedise kugqogqo.

NgoLwesibini, abahlali abaninzi, kuqukwa amaqela agadayo asekuhlaleni kunye neeforam zasekuhlaleni (CPF) baye bancedisana ukukhangela.Lo mfundi webanga lokuqala kwisikolo samabanga aphantsi iPerivale wagqityelwa ukubonwa enxibe ibhulukhwe emnyama kunye nomntla wepijama epinki ngoMgqibelo we6 kweyoMsintsi.

Umama onxungupheleyo, uSamantha Oncke, 25, uthe ugqibele ukubona intombi yakhe ngentsasa yangoMgqibelo.

"Ebelapha ekuhlaleni edlala. Ngokuqhelekileyo, ukuba andikho endlini, uqhele ukuya kudade wethu alale khona, kodwa abuye kwangethuba ngosuku olulandelayo. Akazange abuye ngeCawe kusasa, kwaye ngethuba ndiye kukhangela apho wayekhona, akazange afike kudade wethu. Emva koko ndaya kwisikhululo samapolisa ukuze ndichaze ukuba ulahlekile," utshilo uOncke.

Usaqhubeka ethandazela ukuba intombi yakhe ibuye ikhuselekile.

Isithethi samapolisa eNtshona Koloni, uSajini Wesley Twigg, ungqinile ukuba ityala lomntu olahlekileyo livuliwe.

Amapolisa abongoza nabani na onolwazi olunokuthi ancedise kuphando okanye owaziyo ukuba uphi umntwana olahlekileyo ukuba aqhagamshelane neCrime Stop kule nombolo 08600 10111 okanye asebenzise iMySAPS ukubhala imiyalezo enokunceda, umntu angakhetha ukungazichazi ukuba ungubani.