URamaphosa kufuneka acacise ngokusetyenziswa kwamapolisa kumgodi wabucala, itsho iMKP

IMK Party imemelele uMongameli uCyril Ramaphosa ukuba acacise ubungqina obuthiwe thaca nguLieutenant General Nhlanhla Mkhwanazi kwiKomishoni kaMadlanga, notyhola ukuba uMongameli wayalela uMkomishinala wamaPolisa kuzwelonke ukuba abeke amacandelo akhethekileyo kumgodi wabucala.

Oku kuquka icandelo leSpecial Task Force (STF) neNational Intervention Unit (NIU), nekuthiwa la macandelo abekwa ukubonelela ngokhuseleko olukhethekileyo kwiRichards Bay Minerals (RBM), inkampani yabucala yemigodi.

IMK Party ithi oku kufana nokusetyenziswa kakubi kwezixhobo zokhuseleko lombuso.

"Esi senzo sifana nokuthinjwa kwezixhobo zokhuseleko zombuso ukuze kuxhamle inkampani yabucala, ngemali yabarhafi, ngelixa abemi boMzantsi Afrika besaqhubeka nokujongana nolwaphulomthetho olunobundlobongela, ubundlobongela obusekelwe kwisini, nolwaphulomthetho ngaphandle kokhuseleko olululo," sitshilo isithethi seMK Party uNhlamulo Ndhlela.

Lo mbutho uthi izinto eziye zadizwa zingqinelana nezilumkiso zawo ekudala zikho, uthi zibhentsisa "iOfisi kaMongameli phantsi kukaCyril Ramaphosa elawula ngamaqhinga amacandelo ezokhuseleko ukuze kuphumezwe iinjongo zopolitiko."

"Iziganeko ezixelwe banzi ngexesha leKomishoni kaMadlanga zingqina into ethe gqolo iMK Party ilumkisa ngayo: inkqubo yobulungisa enobuqhophololo kwelona nqanaba liphezulu, apho abantu bezopolitiko beziqhathela amapolisa ukuze akhusele abo basebenzisana nabo, bacinezele uxanduva lokuphendula, kwaye basebenzela iimfuno zabantu abaphezulu.

''Umthetho ujongelwa phantsi ngabantu abafungele ukuwugcina,'' utshilo uNdhlela.

IMK Party ifuna uRamaphosa achaze isiseko somthetho, iindleko ezipheleleyo, kunye nesizathu sokutyalwa kwamapolisa, kwaye aphendule kwiPalamente nakwisizwe ngendlela esi senzo sihambelana ngayo nesibophelelo sakhe somgaqo-siseko sokulawula ngokungakhethi cala.

"Ukuba umnumzana Ramaphosa uyasilela ukuphendula ngendlela eyanelisayo," uNdhlela ulumkise ngelithi, "iMK Party iza kuwugqithisela lo mba ngokusebenzisa iinkqubo zonke zePalamente, Chapter 9, uMphicothi-zincwadi Jikelele kunye neenkqubo zomthetho ukuze aphendule.

"Urhulumente ukho ngenjongo yokusebenzela abantu, hayi iinkampani zemigodi," utshilo.