UFikile Mbalula uyincomile iANC yaseMpuma Koloni noxa iseneengxaki zayo
UNobhala weANC, uFikile Mbalula, ebephakathi kwabahloniphekileyo emngcwabeni obuseNgcobo kwimpelaveki egqithileyo
Image: ANC/Facebook
UNobhala weAfrican National Congress (ANC), uFikile Mbalula, ubalule iyantlukwano njengeyona nto eyingxaki enkulu kowona mbutho wezopolitiko omkhulu eMzantsi Afrika.
Oku ukuvakalise ngethuba ethetha neentatheli emva komngcwabo kamam' uNolandile Mabuya obubanjelwe eDeberha, eNgcobo, ngempelaveki egqithileyo. UMama kaMnu. Oscar Mabuyane wanikezela kwiiveki ezidlulileyo emva kokukhathazwa yimpilo ixesha elide.
Iinkokeli zeANC ephondweni nezikazwelonke beziphume ngobuninzi ngempelaveki ziyomsitha umhlane ngomhla wesifihlo. Phakathi kweendwendwe ezibekekileyo ebezikhona bekukho iinkokeli zeANC apha eMpuma Koloni, ezikazwelonke eziquke uGwede Mantashe, uMbalula, uPanyaza Lesufi waseGauteng nezinye iinkokeli ezininzi.
UMantashe, onguSihlalo weANC kuzwelonke, uthe iiyantlukwano zangaphakathi zezona eziyingxaki embuthweni. Nangona kunjalo, uMbalula uyincomile iANC yaseMpuma Koloni ngelithi iqhuba kakuhle kwicala lokuvuselela umbutho nangona inazo nje iingxaki esajamelene nazo ezifana nokuhlehliswa ongenasiphelo kwenkomfa yolonyulo eBuffalo City.
"Siqhuba kakuhle kwicala lokuvuselela iANC," utshilo uMbalula emva komngcwabo eNgcobo. "Izinto ezifana nabantu abadala uqhekeko siqubisana nazo ngqo. Ziingxaki ezinamaxesha okugunya - kodwa siza kuzoyisa kwiANC.
"Kweli phondo lisekhona ubumbano noxa limane ligungqiswa ziintshukumo zeenkomfa zolonyulo. Ndifuna ukuqinisekisa abantu ukuba siqhubela phambili nokuhlaziya iANC. Ayisinto yosuku olunye, iza kuthatha ixesha elide. Kweli phondo sifuna ukuyigcina iANC imanyene. Sinawo amandla futhi siza kuphumelela," utshilo uMbalula.
Njengokuba iSouth African Community Party (SACP) igqibe kwelokuba ibe ingenele ulonyulo loomasipala kunyaka ozayo, uMbalula uthe imibutho kanxantathu isabumbene noxa kukho lo nto. "Sinentlanganiso esiza kuyibamba neenkokeli zeSACP.
"Iza kubakho phambi kwentlanganiso yesigqeba esilawulayo seANC. Sizimisele ukusiphonononga isigqibo seSACP sokuzimela geqe kulonyulo. Ithetha ukuthini lo nto? Kufuneka siphendulo loo mbuzo. Umsebenzi wethu kukuthetha neenkokeli zeSACP noxa kwiANC singasiboni isidingo sokuzimela kwayo," utshilo uMbalula.