Bashiyeke bencumile abaphathi bakaEskom emva kokuba enze ingeniso entle.
Image: Eskom/Facebook
Emva kweminyaka esixhenxe yokutsala nzima, kuthe qabu kubaphathi bakaEskom emva kokwenza ingeniso encumisayo. Le nkampani enkinkisha umbane eMzanti Afrika yenze ingeniso yeR16-billion seyibhatelwe yonke imali yerhafu okokuqala ukusukela ngo2017.
Oku kudizwe ngabaphetheyo kwaEskom ngethuba bebhengeza iinkcukacha zezimali zonyaka ka2025 kwindibano ebiseGoli. Ziindaba ezamkalwe ngovuyo ngabantu abaninzi ezi ngoEskom oneminyaka emininzi uvuthulula iipokotho zabantu ngamaxabiso aphezulu.
Oku kwenziwe nguEskom nakubeni ebenze ilahleko yeR55-billion kunyaka ophelileyo. Ingeniso ezuzwe nguEskom incediswe kukunyuswa kwexabiso lombane ngo12.74% okushiye abantu abaninzi bekhwina.
Ukucuthwa kwemali echithwe kwimitshini esebenzisa idizili kubenalo igalelo kwinqubela eyenziwe nguEskom. Imali eyongiweyo kwidizili yiR16.3-billion yonke. "Ukufumana inkxaso yeR64-billion kothule umthwalo osindayo kwatsho kwakho imali ehambelana nesicwangciso sethu," itshilo ingxelo ekhutshwe nguEskom.
Emva kokucutha ukucima kombane okuqhokre uqoqosho loMzantsi Afrika eminyakeni ephelileyo, uEskom ukuphelisile ukucinywa kombane okungacwangciswanga abekwenza kwiindawo ezithile ngenxa yokusindwa kwemitshini ngumbane otyiwa ngabantu abangabhataliyo.
"Ingeniso esiyenzileyo siza kuphucula ngayo iintsika zethu zombane. Eminyakeni emihlanu ezayo, sizimisele ukuqinisa iziseko zethu ngemali engaphezulu kweR320-billion," utshilo uDan Marokwane, ingqonyela kaEskom.
UMphathiswa wombane, uKgosientsho Ramokgopa, uqinisekisile ukuba sobe uEskom aphinde onyulwe engxakini yemali nguRhulumente. Iingxaki zikaEskom zongezwa sisikweleti semali eyiR94.6-billion esingade sibhatalwe ngoomasipala.
USihlalo wesigqeba esilawula uEskom, uMteto Nyati, uvumile ukuba ukunyuswa kwexabiso lombane lifikelele kwelona qondo eliphezulu. "Eyona nto esifuna ukugxila kuyo ngoku kukucutha iindleko ngaphakathi enkampanini. Sifuna ukonga imali eyiR112-billion eminyakeni emihlanu ezayo," utshilo uMteto.