Linconyiwe igalelo elenziwe nguNathi Mthethwa obhubhele kwihotele yaseFrance

UMzantsi Afrika uthiwe wambi lilifu elimnyama. Oku kulandela ukuvakala kokusweleka kukaNathi Mthethwa obengunozakuzaku woMzantsi Afrika kwilizwe laseFrance.

Emva kwemini ngoLwesibini wale veki, kuvakele isithonga sokusweleka kwakhe ngamajelo eendaba aseYurophu athe kubhaqwe umzimba wakhe ubanda emva kokuvakala kweendaba ezithi ebegqityelwe ngoMvulo wale veki.

Kurhaneleka ngathi uwe kumgangatho osezantsi esuka kophezulu kwihotele abekuyo eParis. UMthethwa, 58, udlule emhlabeni emva kokusebenzela uRhulumente iminyaka elishumi elinesihlanu njengoMphathiswa weZemidlalo nowaMapolisa.

Emva kokuqinisekiswa kokubhubha kwakhe uMthethwa, kwangoko uMongameli Cyril Ramaphosa uthumele amazwi ovelwano kusapho lukamfi. "Ukusweleka kokaNozakuzaku lixesha elibuhlungu elizweni lonke. Usebenzele uRhulumente nesizwe sethu kwiindawo ezahlukileyo phambi kokulahlekelwa bubomi bakhe ngendlela embi," itshilo ingxelo ekhutshwe nguMongameli.

Umbutho wakhe wezopoliko, iAfrican National Congress (ANC), uvakalise ukothuka nokukhathazeka kwawo ziindaba zokusweleka kukaMthethwa. Ebeyinxalenye yesigqeba esilawulayo kwiANC, iNEC, ukusukela ngonyaka ka2007 ukuya ngo2022.

"Sidlulisa amazwi ovelwano kusapho lakwaMthethwa nezihlobo ngeli xesha lobubi. UMthethwa ebengenguye umsebenzi woluNtu kuphela, ebengumntu owalwela inkululeko nesicaka esisebenzela abantu. Sifuna ukuqinisekisa ukuba siza kulixhasa usapho lakhe emva koko simwonge ngokuqinisa iinzame zethu zokwakha uMzantsi Afrika abewufuna," utshilo uMahlengi Bhengu weANC.

UMthethwa uhambe eza kufuneka kwikomishini kaMadlanga emva kokunyolwa nguNjengele uNhlanhla Mkhwanazi njengomnye wabantu abazama ukunqanda ukuphandwa kukaRichard Mdluli owayetyholwa ngorhwaphilizo kwicandelo lezobuntlola eMapoliseni ngo2011.

"Xa kuthethwa kokungena kwepolitki eMapoliseni, ndaluva ngela xesha. Into endandiyazi mna yayikukuleqa abophulimthetho. Ndanyuselwa kwabe kusenzeka izinto ezingahambelani nomsebenzi wam eMapoliseni," kwatsho uMkhwanazi.

Amapolisa aseFrance athi uMthethwa uthumele umyalezo obuxela into eza kwenzeka ngosuku oluphambi kwesehlo.