Kuthiwa uRamaphosa makahambe!

Imibutho i-#StandUpSA, kunye ne-Enough Is Enough, iza kukhokela umngcelele othi ‘uRamaphosa makahambe’ ePitoli ngoMvulo, imemelela uMongameli uCyril Ramaphosa ukuba arhoxe kwisikhundla sakhe.

Kwingxelo, le mibutho iqinisekise ukuba iza kukhokela umngcelele ngoMvulo we20 kweyeDwarha 2025.

Ngokwala maqela mabini, uRamaphosa usilele ukunqanda urhwaphilizo kumasebe ohlukeneyo karhulumente kwaye wohlulekile ukubonisa ubunkokeli obubambekayo nokuthatha uxanduva.

Bakwatyhola urhulumente wakhe ngokukhula kakubi koqoqosho, ukwanda kokungalingani, kunye neengxaki zemihla ngemihla zabemi boMzantsi Afrika ezinjengokuqubisana nentswela ngqesho, intlupheko nokunqongophala kweenkonzo ezisisiseko.

"Asibambi umngcelele ngenxa yomsindo, kodwa ngenxa yokuthanda ilizwe lethu kunye nokuzinikela kwikamva lalo."

Abaququzeleli bathi umngcelele uza kuphinda uqalise ukusuka eChurch Square ePitoli, nesele iphawulwe ngokusesikweni njengendawo yokudibana ukuze kuqhutywe umngcelele we-#RamaphosaMustGo.

"Isebe lamaPolisa kaMasipala oMbaxa waseTshwane lisinike ngokusesikweni imvume yoqhankqalazo oluqhubeka ngoMvulo, umhla wama20 kweyeDwarha 2025," itshilo ingxelo.

Lo mngcelele uphawula "isiganeko esibalulekileyo" kumalungiselelo ombutho, njengoko usondela kwinto eyibiza ngokuba "yenye yezona zenzo zibalulekileyo zoluntu kwixesha lethu."

"Abemi boMzantsi Afrika kwiphondo lonke laseGauteng bazilungiselela ukubumbana kumanyano, uxolo nenjongo, befuna ubunkokheli bokwenene nokuphendula xa sisithi #RamaphosaMustGo," itshilo ingxelo.

Lo mngcelele uza kuqala ngentsimbi yethoba kusasa eChurch Square ePitoli, unduluke usiya kwiZakhiwo zoMdibaniso ngentsimbi yeshumi kusasa, ufike ngentsimbi yeshumi elinanye kusasa unikezele ngengxelo yezikhalazo kwaye kuthethwe nabo baqhankqalazayo, kuhanjwe kugodukwe ngentsimbi yokuqala emva kwemini.