Inqunyanyisiwe inqununu esolwa ngokusebenzisa gwenxa iR1-million yesikolo
UMnu. Mihlali Makhawula unqunyanyisiwe emva kokuvela kwemali yesikolo esetyenziswe gwenxa.
Image: Uthunyelwe
Isebe leZemfundo eMpuma Koloni linqumamise uMnu. Mihlali Makhalima emva kokuvakala kwezityholo ezithi uchithe imali eqabele kwisigidi seradi (R1-million) ngendlela echasebeneyo nomgaqo wesikolo.
UMakhalima, oyinqunu ye-Ulwazi High School edume ngokuvelisa iziphumo ezihle zeMatriki, ebengundabamlonye ngempelaveki egqithileyo emva kokuba iphephandaba langeCawa, iSunday Times, lipapashe indlela ayisebenzise ngayo imali yesikolo.
Kuthiwa uMakhalisa usebenzise imali yesikolo kwiindawo zokutya, ezentselo, emafutheni emoto nakwezinye izinto. Imali eyiR242 468 ichithwe ekutyeni kwiindawo ezifana neLa Grato Italian Restaurant, iGrazia Fine Food and Wine, iAzzuro , iCafe Neo, Ocean Basket nezinye.
Yona imali ekhutshwe emitshinini yiR450 000, kwiivenkile eziliqela kukhutshwe imali eyiR220 000. Imali ebikhutshwa ngenyanga kuthiwa iqabele kwiR42 000. Ezinye iindawo ekuthiwa imali isetyenziswe kuzo kukho uHungry Lion, uPep, uBoxer, uShoprite neendawo ekojiwa kuzo inyama.
Ngokutsho kweSunday Times, uMakhalima uxhamle nezinye iititshala abantu abaphethe isikolo (SGB) nabantwana besikolo. "Le ndawo niyibonayo yotywala ikwa yindawo ethengisa inyama. Ndandithenga kuyo inyama," utshilo uMakhalima ezama ukuzithethelela kwimibuzo ayihlatywe yiSunday Times.
Njengokuba yona inqununu ibisitya kwiindawo zodidi oluphezulu, bona abafundi bathi bebetyiswa ukutya okungacacanga. "Thina sitya umngqusho ongenanto, irayisi enezibindi zenkukhu okanye sitye irayisi enekhaphetshu," utshilo umfundi ongachazwanga ngegama yiSunday Times.
Abafundi besikolo baqikelelwa kwiwaka elinamakhulu amabini (1 200). UMakhalima uvumile ukuba bayathenga kwaKFC xa bechophele iintlanganiso (SGB) ethathe ixesha elingaphaya kweeyure ezine.
Noxa abafundi bekhala - kodwa iSunday Times ithi baxhamle kwimali esetyenzisiweyo. Isebe leZemfundo liqinisekisile ukuba uMakhalima ushenxisiwe esikhundleni sakhe kude kusongwe uphando olunzulu nguRhulumente.
Kuqinisekisiwe ukuba yimali yokutyiswa kwabantwana le kuthiwa isetyenziswe gwenxa. Oku kwenzeka ngexesha elibi abantwana bezikolo beqale iimviwo zokuphela konyaka.