Umfundi waseNMU ohlatywe wabulawa ebesenza unyaka wesithathu
Kuvakala ukuba umfundi waseNMU ohlatywe wabulawa kulandela umlo ebesenza unyaka wesithathu.
Image: Nelson Mandela University
Umfundi, 24, ohlatywe wabulawa ngomnye, 26, ngentseni yangoMvulo ngenxa yengxwabangxwaba kubikwa ukuba ebesenza unyaka wesithathu nalapho ebefunda iDiploma kwiLogistics kwiYunivesithi yaseNelson Mandela (NMU).
Isithethi seNMU, uZandile Ngwendu, uthe lo mfundi ebekunyaka wesithathu kwiFaculty of Business and Economic Sciences esenza le Diploma ikhankanywe ngasentla.
"Ulwazi lokuqala lubonisa ukuba lo mfundi ufunyenwe engaphefumli kwindawo ehlala abafundi engaphandle kwekhampasi eyaziwa njengePremier Student Accommodation (PSA). Umrhanelwa ngoku useluvalelweni lwamapolisa," utshilo uNgwendu.
Ngaphambili, I’solezwe lesiXhosa libike ukuba kubanjwe umfundi kulandela esi sehlo nesenzeke kwindawo ehlala abafundi eStrand Street, eCentral, eGqeberha.
Ngokwengxelo kaCaptain Sandra Janse van Rensburg ithi, pha ngezithuba zentsimbi yesine ekuseni umrhanelwa nexhoba baxabene ngaphakathi kwindawo yokuhlala abafundi eseStrand, eCentral.
Ingxelo iqhuba ithi abanye abafundi bazamile ukunqanda lo mlo nabanye balithatha ixhoba elonzakeleyo balisa egumbini lalo. Ixhoba liye labhaqwa ebhedini yalo lingasaphefumli, kwabizwa abohlangulo olukhawulezileyo nabanye balichaza njengelibhubhileyo.
Uye waqinisekisa ukuba iNMU ibinxibelelana nosapho lwalo mfundi ukudlulisa amazwi ovelwano kunye nokunika inkxaso ngeli xesha libuhlungu.
"Siyaqonda ukuba esi sihelegu sisenokuba sibachaphazele ngokunzulu abafundi bethu abaninzi. Bonke abafundi abachaphazelekayo bayakhuthazwa ukuba bafikelele kwiinkonzo zoluleko lwengqondo ezifumanekayo kwiziko iEmthonjeni Student Wellness kuzo zonke iikhampasi," utshilo uNgwendu.
Uqhube wathi: "Iingcinga nemithandazo yethu ikusapho lomfundi, izihlobo, abo bebefunda nabo, nabo bonke ababemazi umfundi. Wanga umphefumlo wakhe ungaphumla ngoxolo."
Umrhanelwa kulindeleke ukuba avele enkundleni ngomso ngoLwesibini, ujongene netyala lokubulala.
Kutshanje, kubulewe umfundi omnye waza wonzakala omnye kulandela isiganeko sobundlobongela apho kuye kwaqhekezwa kwindawo ehlala abafundi eSummerstrand. Ngoku kubhubhe abafundi ababini kule Yunivesithi kwinyanga yeDwarha ngenxa yeziganeko zobundlobongela.