IBaroka FC izikhotha amanxeba emva kokuba ibethelwe oogqirha nezicaka yiBidvest Wits ngo’5-0 kumdlalo we-Absa Premier Soccer League kwimizuzu namhlanje eBidvest Stadium. IiClever Boys zibuyele phezulu ngoku kwiPSL emva kokuqokelela amanqaku kumdlalo ongakhange uyinzimele konke kone kubusuku banamhlanje. Amagowuli weWits afakwe nguBuhle Mkhwanazi (x2), Daine Klate, Ejike Uzoenyi noPhakamani Mahlambi.
Lo mdlalo ubulawulwa yiWits kuzo zozibini izigaba – nangona iBaroka ikhe yazama ukukhabalaza ngamaxesha athile. Ngaphandle kwamathandabuzo uGavin Hunt yindoda eyonwabileyo yindlela izinto ezihambe ngayo kulo mdlalo ngoba unomdlalo omkhulu ngempelaveki. Amakhwenkwe kaHunt andwendwela iintshatsheli ze-Afrika, iMamelodi Sundowns, eLoftus Stadium. Umdlalo ophakathi kwala maqela usoloko utak’iintlantsi. Ngoku omabini afuna ukuphakamisa indebe yePSL ekupheleni kwale sizini.
Komnye umdlalo obutshisa bhe ngale ntlwa ubuphakathi kweSuperSport United neMaritzburg United. Amatsatsantsa a Pitori adlakaze kakubi iTeam of Choice ngo’4-1 othuleyo kumdlalo wePSL obuseLucas Moripe Stadium. Oku kwenzeka emva kokuba amakhwenkwe kaStuart Baxter ebuya kumdlalo weCaf ngempelaveki edlulileyo. Iindwendwe zingcangcazelise umnatha kuqala ngonyawo lukaKurt Lentjies kwisigaba sokuqala somdlalo. Amagowuli weSuperSport afakwe nguMandla Masango amabini, uKingston Nkatha noJeremy Brockie. Iziphumo zanamhlanje ziyithathe iSuperSport zayibeka kwindawo yesithathu kwiPSL. UMasango obeqala ukufaka amagowuli kule sizini njengoku esuka phesheya uvakalise uchulumanco kakhulu – kodwa yena umqeqeshi wakhe, uStuart Baxter, akonelisekanga kwaphela yindlela elidlale ngayo iqela lakhe nangona likwazile ukufumana impumelelo kulo mdlalo.
BUKELA – Usuku lwenkululeko: Izimvo zabantu