Livele phambi kwenkundla yamatyala eMonti ngoMvulo ipolisa eligama linguZandisile Zweni onamashumi amane anesine ubudala (44) emva kokuba ethe wadubula wabulala unkosikazi wakhe uAndiswa Zweni (36).
Ityala limiselwe umhla wamashumi amabini anesixhenxe kwinyanga ezayo. UZweni ukwalindeleke ukuba afake isicelo sebheyile enkundleni ngomso (uLwesine).
UZweni wabanjwa ngoogxa bakhe esipoliseni kwiveki ephelileyo emva kokudubula unkosikazi wakhe wabhubha kumarhe esikhwele. Ixhoba ladutyulwa kwisikolo iVoorpos Primary eCambridge ngoLwesine.
Ngokwengxelo ephuma kwisithethi samapolisa ephondo uKapteni Khaya Tonjeni, eli polisa, elikwibakala lobuConstable, belisebenza kumapolisa aseKidds Beach eMonti.
Iingxelo zithi eli polisa lithulule ngeembumbulu kwimoto ebi qhutywa ngunkosikazi walo uAndiswa.
Iingxelo ezingakhange ziqinisekiswe ngamapolisa zithi, eli polisa likonzakalise indoda ekutyholwa ukuba ibincuma nenkosikazi yalo.
UMkomishinala wamapolisa ephondo eNjengele Liziwe Ntshinga uthi siyothusa esi sehlo.
“Sidlulisa amazwi ovelwano kusapho lalowo uphulukene nobomi, sikwenza oko ngokugxeka esi sehlo. Amalungu ethu makafunde ukuthetha namalungu awo osapho, iinkonzo okanye abazali xa befumana iingxaki kubomi babucala,” utshilo.
BUKELA – Usuku lwenkululeko: Izimvo zabantu