UZwane angayigweba indlala yeminyaka kwiChiefs?

Amakhosi atyumbe uArthur Zwane njengomqeqeshi wawo omtsha. UZwane, oza kuncediswa nguDillon Sheppard, ubhengezwe ngokusesikweni kwiveki egqithileyo njengeyona ndoda efanelwe sesona sikhundla esitshisayo ebholeni yaseMzantsi Afrika. Nangona uZwane engumqeqeshi ongenamava kangako kwinqanaba eliphezulu lebhola ekhatywayo – kodwa ukunyuselwa kwakhe kuqhwatyelwe izandla ngabantu abaninzi kuba enethuba elide ekwiKaizer Chiefs esebenze nabantu abafana noGavin Hunt noStuart Baxter ogxothwe phambi kokuphela kwesizini yeDStv Premiership ka-2021/22. Yiminyaka esixhenxe ngoku kungasangeni ndebe eNaturena. Ayimnandanga lo nto kubalandeli beChiefs abasoloko neneengcwangu. Umbuzo: Ingayigweba na indlala yeminyaka uZwane?

Akukho bani owaziyo – kodwa yena ubethe ngenqindi phantsi ngelithi: uza kuyikhupha iChiefs ehlazweni eliyombetheyo. “Ndizimisele ukubila de ndichontsize igazi,” utshilo uZwane obexhagwe nguBobby Motaung noKaizer Motaung Junior. “Ndiza kuwakhupha onke amandla wam ukuze ndiqiniseke ukuba iChiefs iyaphumelela. Igalelo lam ndifuna libonakale. Ndifuna ukwenza into ekhethekileyo kwiChiefs. Xa ndicinga into endiyenzelwe yiChiefs ebomini bam, kunyanzelekile ndiyibuyekeze,” utshilo uZwane ezibophelela eFNB Stadium kwiveki ephelileyo. Amakhosi avale isizini ehleli kwindawo yesihlanu emva kokuphisa kwemidlalo engeyibeke kwindawo yesibini. Kanti kwisizini ephambi kwale isongwe kwinyanga kaCanzibe, iChiefs yangena nzima kwiTop 8.

Ezo zizinto ezibonisa ubunzima ajongene nabo uZwane xa kuqala isizini ezayo. UMotaung Jnr usichazile isizathu esibangele bachonge uZwane bengabaphathi. “Besifuna umntu oyaziyo indlela edlala ngayo iChiefs. Emva kwamashumi amabini anesibini esebenza kwiChiefs, sibone uZwane njengoyena osifaneleyo isikhundla,” utshilo uMotaung Jnr. Njengabanye abaqeqeshi uBobby Motaung uthe uZwane kufuneka aze neendebe – kodwa bazimisele ukumxhasa ngeendlela zonke. “Ukunyuselwa kukaZwane yinto ebicwangcisiwe. Sinethemba lokuba inkxaso yabalandeli neqela lonke iza kumnika impumelelo abengomnye wabaqeqeshi abenze imbali eMzantsi Afrika, utshilo uBobby Motaung.