Amatsatsantsa azimisele ukuthunuka Amakhosi emdlalweni osePolokwane!

Ifolosi yeSuperSport United, uGamphani Lungu, uthi bazimisele ukunyathela iKaizer Chiefs bathathe amanqaku emdlalweni ongempelaveki. Amatsatsantsa amkela Amakhosi emdlalweni weDStv Premiership ekulindeleke ukuba utake iintlantsi ePeter Mokaba Stadium ngentsimbi yesithathu emalanga ngoMgqibelo.

Okuza kunika umdla ebantwini abaninzi kukuba emdlalweni wangempelaveki kudibana amaqela angaqhubanga kakuhle emidlalweni yawo egqithileyo. Iqela ngalinye kula mabini lifuna ukuphumelela ngoba akafuni ukuphuncukwa ziindawo kwiTop 8 xa kusongwa isizini ekupheleni kwenyanga ezayo kaCanzibe.

Iqela likaGavin Hunt aliqhubanga kakuhle emidlalweni emihlanu egqithileyo. Kwiveki ephelileyo, liguqiswe phantsi yiChippa United yatsho yangena kwiTop 8 okokuqala kule sizini. Yona iChiefs ibethwe liqela elisemsileni, iRichards Bay – kodwa ibikhe yanyathelwa nayo yiChippa United kwiiveki ezigqithileyo emdlalweni obuseMonti.

ULungu uthi bazimisele ukuvuka ngayo iChiefs esoloko igqwidiza xa idibene neSuperSport United. “Omabini amaqela aza kudibana enethuba elide engaqhubi kakuhle,” utshilo uLungu – ongomnye wabadlali athembele ngabo uGavin Hunt.

“Sekulithuba sagqibela ukuphumelela umdlalo. Sizimisele ukuguqula izinto emdlalweni wangoMgqibelo,” utshilo uLungu kwiSowetan. Njengokuba Amatsatsantsa engakwazi ukuphumelela imidlalo, eyona nto eyingxaki ebonakalayo kukuba kufakwa amagowuli kuyo ngendlela eyothusayo.

Kwiiveki ezidlulileyo, iStellenbsch ikhe yafaka amagowuli amane. “Sidinga iziphumo ezincumisayo, ngoku. Onke amaqela anamaxesha okungaqhubi kakuhle. Nakuthi kufike elo xesha noxa sidlale kakuhle emidlalweni yethu egqithileyo. Siphise ngamagowuli lula, kufuneka siyilungise lo nto.

“Lifikile ixesha lokuba iqela lethu liphumelele imidlalo. Sayibetha iChiefs emdlalweni wokuqala ebaleni layo. Iza kuza kuthi ifuna ukuphepha ukubethwa kabini sithi. Ndicinga ukuba kufuneka siqhubele phambili nokudlala ngendlela yethu – kodwa ndinethemba lokuba siza kuzifumana iziphumo ezihle.

Umdlalo uza kuba nzima ngoba iChiefs iza kuthi ikhangela impumelelo. Amanqaku abaluleke kakhulu njengokuba kusongwa isizini. Umoya wabadlali uphantsi enkampini – kodwa umqeqeshi uyazama ukubakhuthaza abadlali. Siza kuya emdlalweni ngokufanayo nakweminye,” utshilo uLungu.