Isecicini lokuphumelela iindebe ezintathu kwisizini enye iMamelodi Sundowns. Oku kwenzeka emva kokuba ibethele kowayo iStellenbosch ngamagowuli amabini kwelinye emdlalweni weNedbank Cup obunzima eDanie Craven Stadium emalanga namhlanje.
Amagowuli ayiwelisileyo iSundowns afakwe nguKhuliso Mudau noThembinkosi Lorch. Ukuphumelela kweDowns kuthetha ukuthi iza kudibana ne’Orlando Pirates emdlalweni oza kube useMbombela Stadium ngomhla wokuqala kwinyanga yeSilimela. Yona iPirates ibethe iChippa United ngo’3-1 izolo eGqeberha.
Isiqingatha sokuqala siphele iSundowns ihamba phambili ngegowuli elinye eqandeni. Umdlalo uqalwe ngesantya esiphezulu ngamaqela omabini abesilwela ukuphumelela indebe yeNedbank ebithathwe yiPirates kunyaka ophelileyo.
Emzuzwini wesine kwisigaba sokuqala, u’Oscarine Masuluke, uye wanyanzelwa yiSundowns ukuba achithe ibhola ebinomfaka engxakini. Iquqe iphindelela iSundowns emhlabeni kaMasuluke yade yavuzwa ngegowuli elifakwe nguKhuliso Mudau emzuzwini weshumi.
UMasuluke woyiswe kukuvala ibhola ekhatywe nguMudau kwicala ebevale kulo. Izamile ukuhlasela nayo iStellenbosch ebiphantsi koxinizelelo. Kukhe kwamiswa umdlalo ixesha elide ngenxa yokonzakala komncedisi kasompempe oye watshintshwa.
Ayifunanga ukudlala umdlalo wayo oqhelekileyo iDowns ngoba iDanie Craven Stadium ayinayo ingca eyivumelayo lo nto. Nakubeni izamile iStellenbosch ukudala amathuba kwisigaba sokuqala – kodwa side saphela ingakwazanga ukufumana igowuli lokulinganisa.
Umdlalo unike umdla ngakumbi kwisigaba sesibini ngoba omabini amaqela ebehlaselana. Amakhwenkwe kaSteve Barker ayihlasele macala onke iSundowns. Into eyenze kakuhle iSundowns kukugada iRayners owaziwa ngokufaka amagowuli.
Emzuzwini wamashumi asixhenxe anesithathu, uThembinkosi Lorch ufake igowuli yatsho yakhokela ngamabini iSundowns. UPeter Shalulile uphose ipenela emzuzwini wamashumi asibhozo. UGenino Palace ufake igowuli leStellenbosch – kodwa iSundowns iwuphumelele ngo’2-1 umdlalo.
URanga Chivaviro ufuna iChiefs iqume ihlazo ngokungena kwiTop 8