Le yiveki engasoze ilityalwe ngabalandeli be-Orlando Pirates emva kwesithwakumbe sokubethwa kwayo kanobom ngo’6-1 yiSuperSport United kumdlalo we-Absa Premier Soccer League eMbombela Stadium.
Esi sisehlo esingamkelekanga kwaphela kwiqela elikhulu elifana nePirates elisazama ukulibala okwenzeke kwisizini ephelileyo. Ngoku iPirates ikhangela umqeqeshi omtsha emva kokukhululwa kukaMuhsin Ertugral ngusihlalo uGqirha Irvin Khoza izolo. “Sizakuxoxa ngomqeqeshi ozakungena endaweni ka-Ertugral kude kube yinyanga ezayo,” utshilo uKhoza.
Umqeqeshi olahlileyo, uMuhsin Ertugral, uthe uzakunika incwadi yokulahla kwakhe njengomqeqeshi uKhoza emva komdlalo ngoLwesibini.
Le ndedeba, 43, ibone kufanelekile ukulahla kwayo emva kokuhlazwa kwePirates eMpumalanga. “Akukho nto ndiyicingayo ngomdlalo emva kwezi ziphumo – ndihlazekile qha yile nto. Andazi ndingathini ngale nto kwiqela elikhulu kangaka.
“Zange ndayibona into enje oko ndabangumqeqeshi. Ndizakudibana nosihlalo wePirates ukuze ndimnike incwadi yokulahla kwam ngoba sithi abanoxanduva ekugqibeleni,” utshilo * -Ertugral kwiSuperSport TV emva komdlalo. Umqeqeshi olibambela ngu-Augusto Palacios kude kubekho umqeqeshi osisigxina.
Kuvulwe isikolo esixabisa iR106-million KwaMaxhama