iSundowns iyibethel’ogqirha nezicaka iPolokwane City kwiNedbank Cup

Ibokoboko amacala iPolokwane City emva kokubethelwa oogqirha nezicaka yiMamelodi Sundowns ephumelele ngemvula yamagowuli amane onke eqandeni (4-0) emdlalweni weNedbank Cup obubanjelwe eLoftus Stadium emalanga namhlanje. Amasandawana azibekele indawo kumjikelo olandelayo weNedbank Cup aza kudlala kuwo ne-Orlando Pirates. UManqoma Mngqithi ubophe abadlali abadlali abaliqela abangaqhelanga kuqala imidlalo emva kohambo olusuka eDemocratic Republic of Congo – apho iMamelodi Sundowns ibethe iTP Mazembe ngo’2-1 emdlalweni weCaf Champions League ewugqibe ingaphelelanga ngenxa yekhadi elibomvu elinikwe umdlali wayo kwisigaba sesibini somdlalo.

URicardo Goss, uRushine De Reuck, uHaashim Domingo ngabanye babadlali abafumene ithuba namhlanje. Emzuzwini weshumi umdlalo uqalile, uPeter Shalulile ubhalise igowuli lokuqala leSundowns. Ulandele ngelakhe igowuli uLebohang Maboe, emva kwakhe kwalandela u-Andile Jali ngepenela emva kokuwiswa kukaLesedi Kapinga esukela ibhola ebisuka kuKermit Erasmus. Igowuli lesine lifakwe nguKapinga ngokwane. Kuthe kwakubonakala okokuba umcimbi ucalanye, uManqoba Mngqithi ufake abadlali abafana no-Aubrey Modiba, uPromise Mkhuma noKeletso Makgalwa. Umdlalo ubulawulwa yiSundowns, akukho nto ecacileyo eyenziwe ngabadlali bePolokwane City edlala kwiGladAfrica Championship ngenxa yamagowuli afakwe kubo kwangoko emdlalweni.

Amasandawana azityele itheko esiswini ebesilawula nguGeorge Maluleka – kodwa, aye awuthoba umgangatho kwisigaba sesibini. Akayithandanga lo nto umqeqeshi weDowns ngoba uthi yena ufuna iqela lifake amagowuli amaninzi xa amathuba ekhona njengasemdlalweni wanamhlanje. Iqela lasePitoli limkhaphe ngaloo magowuli mane uMongameli walo, uGqirha Patrice Motsepe, oza kubeka phantsi ngomso athathe isihlalo seCaf emva kolonyulo angakhuphisani namntu kulo eRabat kwilizwe laseMorocco.

Sundowns: Goss, Morena, Lakay, De Reuck, Nascimento, Maboe, Jali, Domingo, Erasmus, Kapinga, Shalulile.

Amalalela: Mweene, Modiba, Soumahoro, Sirino, Zwane, Maluleka, Makgalwa, Affonso, Mkhuma.

Polokwane: Phoko, Haoseb, Laqwela, Ngcobo, D. Goss, Hlalele, Phiri, Nyathi, Nku, Tlolane, Muyaba.

Amalalela: Ndlovu, Chembezi, Shange, Ngobe, Mokiti, Masebe, Nkomo, Mahangwahaya.

×

1/1: Andile Jali of Mamelodi Sundowns celebrates scoring a penalty with Peter Shalulile of Mamelodi Sundowns during the 2021 Nedbank Cup Last 16 match between Mamelodi Sundowns and Polokwane City at Loftus Versfeld Stadium, Pretoria, on 10 March 2021 ©Samuel Shivambu/BackpagePix

❮❯