Emva kokubethwa
kwiveki ephelileyo yiPolokwane City, namhlanje iChippa United izibethele iBlack
Leopards ngamagowuli amabini kwelinye (2-1) emdlalweni we-Absa Premiership obudlalelwa
eThohoyandou Stadium kobu busuku. Igowuli elifakwe nguThabo Rakhale
kungekapheli nomzuzu umdlalo uqalile libeke iChippa United endaweni entle eThohondaou
Stadium ebigcweliswe ngabalandeli beLeopards njengesiqhelo xa kudlala iqela
labo. Kodwa elona gowuli elithe lenza umahluko lelo lifakwe nguSilas Maziya
emzuzwini wokugqibela. Ukuphumelela kwayo iChippa emdlalweni wanamhlanje
kuyinika amandla njengokuba ilungiselela ukudibana nelinye iqela elisokolisayo,
iMaritzburg United, emdlalweni ozakube useSisa Dukashe Stadium, eMdantsane,
ebusuku ngoMgqibelo.
Kuyiwe kwixesha
lokuphumla iChippa United isakhokela ngegowuli elinye. Nangona iqela
ebilindwendwele belikwazile ukubhalisa ebhodini – kodwa umdlalo ubulawula
yiLeopards. Ukuye kwancomeka kukuba iChippa ikwazile ukuyivala iLeopards edlale
umdlalo ophucukileyo nangona ingakwazanga ukufaka elinye igowuli lesibini. Kweminye
imidlalo yanamhlanje, iKaizer Chiefs ivuthulule iHighlands park ngo’3-0
emdlalweni obuseFNB Stadium. Yona iGolden Arrows ibethe iBaroka FC ngegowuli
elinye emdlalweni obuseSugar Ray Xulu Stadium. ISuperSport United ibambene
ngamagowuli amabini (2-2) neMaritzburg United emdlalweni obuseLucas Moripe
Stadium. Kanti wona AmaZulu, abehamba phambili, alahle amanqaku emdlalweni
abambene
ngo’2-2 kuwo eKapa.
ISwallows iquthise iChippa phambi kwabalandeli bayo eBuffalo City Stadium