Itumente eqingqithe iintsuku ezintathu zonke kule veki ide yafikelela esiphelweni ngale njikalanga yanamhlanje. Iqela elinabadlali abadlale ngokukhulu ukuzimisela ekuthiwa yiBrilliant Brothers lilo eliphumeleleyo kweli velatanci letumente ebixhaswa liphephandaba labantu – I’solezwe lesiXhosa libambisene noVodacom. IBrothers ifumene ikiti entsha kraca futhi epheleleyo emva kokubetha iGreen Lovers kumapenela ngamagowuli amane kwamathathu namhlanje eNU 6 Grounds. Le midlalo idlalwe ngamaqela aphantsi koMdantsane Local Football Association.
Amaqela athathe inxaxheba kule tumente aquka iBrilliant Brothers ephumeleleyo, United Stars, Entertainer, Stars, Aces, Island, Celtics, Texas, Spears, Green Lovers, Pirates, Willows, Pillars, Madrid neChelsea. Onke la maqela ebedlalisa abadlali abaneminyaka engaphantsi kweshumi elinesihlanu – iminyaka ehambelana ncakasana neenjongo zale tumente ezingokuphuhlisa abadlali abasakhulayo kwibhola ekhatywayo.
Nangona iGreen Lovers ibinqwenela ukuba ziintshatsheli zetumente yeSolezwe – kodwa ixoliswe kukubamba indawo yesibini. Ithiwe jize ngezikipha nguVodacom. Umfanekiso: Pedro Mapelo
Umdlalo wamagqibela kankqoyi obuphakathi kweBrothers neLovers ubutaka iintlantsi. Omabini amaqela ebebeke iliso lawo kwibhaso elikhulu lale tumente. Nangona izinto ziye zajika nje – kodwa yiGreen Lovers etsazise igazi kuqala kwidabi lala maqela aseMdantsane. Ikwayiyo ebinomdlalo ophucukileyo kakhulu kwisigaba sokuqala somdlalo. Kuthe kwakutshintshwa amacala, kwabonakala ukuba iBrothers ifumene amacebiso amatsha nenkuthazo engumangaliso, umdlalo wayo uye watshintsha futhi imidlala inenjongo ecacileyo. Ifumene igowuli elihle kakhulu lokulinganisa xa siphakathi isigaba sesibini somdlalo.
Umdlalo ububambene – kodwa kuye kwanyanzeleka ukuba uye kumapenela emva kokubambana kwawo la maqela ngo’1-1. Nakuwo amapenela, iLovers yiyo ewaqale kakuhle, kodwa iye yoyiswa ekugqibeleni. Ngalo ndlela yaba iBrothers izizuzela ikiti yebhola entsha kraca.
Iphele njalo indlela yeSundowns kwiCAF Champions League!