Kubonakala ngathi iChippa United izakuphulukana nomnye wabadlali bayo ababalulekileyo – uThamsanqa Sangweni.
Lo mdlali-siswini waKwaZulu Natal kudala efunwa ngamaqela aseGauteng – kodwa ngoku yiBidvest Wits ekuvakala ukuba izimisele ukumthathela kuyo. Iingxelo eziphuma eGoli zithi uSangweni uthiwe tshe ezilolonga neentshatsheli ze-Absa Premier Soccer League zika-2016/17, iWits, ekuqaleni kwale veki.
Isivumelwano sengqesho sikaSangweni neeChilli Boys sifikelela esiphelweni xa kuphela le nyanga yeSilimela, ngoku kubonakala ngathi lo mdlali akazimiselanga kuhlala eMpuma Koloni kwisizini ezayo.
USangweni, obekwangukapteni weChippa kwisizini ephelileyo, udlale indima ebalulekileyo kwiChippa kwezi sizini zimbalwa ekuyo.
Ukuhamba kwakhe zindaba ezimbi kweli qela lisinde ezembeni kwisizini ephelileyo. USangweni udlalele amaqela afana neMamelodi Sundowns, AmaZulu FC ne-Ajax Cape Town.
ULucky Baloyi, okhululwe yiKaizer Chiefs kutshanje, ngomnye wabadlali ekunokwenzeka batyikitywe yiChippa United phambi kokuqala kwesizini entsha.
USteve Barker umchaze njengeqhawe uRayners ongcwabe iPolokwane City