Abambe ipolisa lomgunyathi amapolisa aseMatatiele,
nelikwangumrhanelwa kwityala lokubulala.
Le ndoda eminyaka ingamashumi amane ibivele
enkundleni kamantyi wale dolophu, nalapho ijongene namatyala aquka, elokubulala,
isazisi somgunyathi esimchaza njengepolisa, netyala lokuphanga.
Oku kuvele ngethuba ummangalelwa efaka isicelo
sebheyile. Umbuso usiphikisile isicelo sebheyile somrhanelwa ngelithi ujongene
namatyala anobuzaza.
Utyholwa ngokubulala igosa lendlela kumasipala
waseMatatiele uDawn Mackenzie kweyeDwarha kulonyaka emva koko waba umpu kamfi.
UMackenzie obenamashumi amathathu ananye ngethuba lokubulawa
kwakhe ngumrhanelwa wafunyanwa eswelekile kwimoto yomsebenzi, enamanxeba
okudutyulwa kwesinye sezisitalato zale dolophu.
Amapolisa akwavelise ubungqina bokuba unesazisi
somgunyathi sobupolisa. Umrhanelwa ubanjwe kwiiveki ezimbini ezidlulileyo kwindlu
ayiqeshileyo eKokstad emva kokuba amapolisa ehletyelwe ngokubandakanyeka kwakhe
kwisiganeko.
Isithethi samapolisa aseMatatiele uKhaputeni
Raphael Motloung uthe: “La, ngamatyala anobuzaza kwaye kuyabonakala
ukuba umrhanelwa lo unobuchule kulwaphulo mthetho.
Akukacaci ukuba usifumene phi, kanjani isazisi somgunyathi,”
utshilo uMotloung. Ulumkise uluntu ngabantu abazazisa njengamagosa
karhulumente benenjongo ezimbi.
Uthe amapolisa asaphanda ngokunye ekungenzeka
ukuba kwenziwe ngumrhanelwa ekhohlisa abantu njengepolisa, esebenzisa esi sazisi
kwanompu awawuba kwixhoba.
Ukwathe amapolisa aphanda nabanye ekungenzeka ukuba
basebenzisa oluhlobo ukwaphula umthetho.
BUKELA – Usuku lwenkululeko: Izimvo zabantu