IZimbane Killers ibethe iMatta Milan ngo 7 – 0 kumdlalo we-ABC Motsepe League obubanjelwe eWalter Sisulu, eGcuwa, emva kwemini ngoMgqibelo.
Amgowuli afakwe nguMxaba Avela [2], uNojiya Simlindile [2], uSkhosana Khuthukuthela [2], lo gama uKapteni, uKumelo Avela, efake elokuvala.
IiKillers zihambe lula kusaqalwa, ziwulawule umdlalo emva kokuba kuvuleke ikroba kwiMata Milan ebingazithembi xa iphethe ibhola.
Kwisiqingatha sokuqala, iiKillers zidale amathuba acacileyo, kodwa zisebenzise amathuba ngobuchule, kuhlatywe ikhefu zinkqenkqeza phambili ngo’3-0.
Xeshikweni kubuywa kwisiqingatha sesibini, iMilan, khange ibonakalise lwamvila nokunxanelwa amagowuli, endaweni yoko ibonakele ilahle ithemba.
Iqela laseLusikisiki liqhubele phambili kulo mdlalo nokulawula ngokufaka imvula yamagowuli amane kwisiqingatha sesibini.
IMilan iphulukene nomdlalo wesithathu ilandelelana; ibethwe yiTornado ngo 4 – 1, yabethwa yiKokstad Liverpool ngo 5 – 1.
Kwelinye icala, iLion City isahleli kwindawo yokuqala kwi-ABC Motsepe League emva kokuba ibethe iFuture Tigers ngempelaveki ngo 4 – 0, iTornado FC isahleli kwindawo yesibini ngamanqaku angamashumi amahlanu anethoba (59), emva kokuba ibethe iMthatha City ngamagowuli amane eqandeni.
IZimbane Killers ihleli kwindawo yesithathu ngamanqaku angamashumi amahlanu anesine.
Omathathu la maqela ashiyeke nemidlalo emithathu phambi kokuba isongwe isizini ka-2015/16, ngoku adlale imidlalo engamashumi amabini anesixhenxe.
Iziphumo ze-ABC Motsepe
Lion City 4-0 Future tigers SUBS 0-0 Highbury Young Ideas 1-1 FC Elliot
EC Bees 3-1 Kokstad Liverpool
Fc Buffalo 7-2 Morning Stars
Mthatha City 0-4 Tornado
Matta Milan 0-7 Zimbane Killers
Iphele njalo indlela yeSundowns kwiCAF Champions League!