AmaZulu abethwe ngodlwabevu lwempama zacima izibane eLucas Moripe Stadium

AmaZulu
agoduka ethokombise iintloko emva kokuhlazwa yiMamelodi Sundowns ngemvula
yamagowuli amahlanu eqandeni (5-0) emdlalweni weTelkom Knockout obubanjelwe
eLucas Moripe Stadium emalanga namhlanje. Udlwabevu lwempama iDowns ebethe
ngalo AmaZulu kuthumela umyalezo ocacileyo emaqeleni aza kudlala nayo emidlalweni
ye-Absa Premiership kwiveki ezayo. UPitso Mosimane uqale umdlalo ngamadoda
afana no-Andile Jali, uThapelo Morena no-Anele Ngcongca. Kanti yena uJozef
Vukusic udlalise abadlali abatsha abafana noNeil Boshoff noMario Booysen – ogwaze
umkhonto ekhaya emdlalweni wakhe wokuqala emva kokutyikitywa ekuqaleni kwale
veki. Umdlalo ulawulwe yiSundowns zisuka kwisiqingatha sokuqala – kodwa uBonginkosi
Ntuli ukhe wazama ukuyisokolisa.

Amasandawa
aye kwixesha lokuphumla ehamba phambili ngegowuli elinye elifakwe nguJose Al Meza.
Kwisigaba sesibini, uBooysen uphe iDowns igowuli okwenduku yomnquma. UGastin
Sirino ufake amabini laze elukugqibela lafakwa ngumdlali osemtsha ekuthiwa
ngu-Offonso emva kokufumana ibhola entle egotywe nguThapelo Morena ephikweni
lasenxele. UThemba Zwane noSibisiso Vilakazi ngabona badlali abenze iingxaki
kuSuthu bencediswa nguHlompho Kekana noJali esiswini. Ukuphumelela kweSundowns
ngamagowuli amaninzi kuza kufunqula ukuzithemba ebadlalini njengokuba
ilungiselela ukudlala neKaizer Chiefs eyibethe ngamagowuli amane kwamabini
(4-2) emdlalweni weShell Helix Ultra Cup kwiveki ephelileyo.

Sundowns: Onyango, Langerman,
Ngcongca, Madisha, Jali, Kekana, Lebusa, Sirino, Meza, Zwane, Morena.

Amalalela: Mweene,
Vilakazi, Coetzee, Lakay, Maboe, Mahlambi, Affonso.

AmaZulu: Boshoff,
Sikhakhane, M.Gumede, Xoki, Booysen, Vilakazi, Darpoh, Sithebe, Ncube, Karuru, Ntuli.

Amalalela: Mbatha, P.
Gumede, Khumalo, Morton, Maduna, De Jong, Majoro.