Idlale umdlalo ocomekayo namhlanje i-Orlando Pirates emva kokuba ibeke Amatsatsantsa a Pitori endaweni yawo. AmaBhakaniya abuye ngamandla elandela ngasemva ayibetha ngamagowuli amabini kwelinye (2-1) iSuperSport United emdlalweni obubanjelwe e-Orlando Stadium ngorhatya lwanamhlanje. Impumelelo yePirates namhlanje iyibeke phezulu kwiPSL ngamanqaku asibhozo emva kwemidlalo emine.
Umdlalo uphakathi kwala maqela mabini usoloko utaka iintlantsi, nalo wanamhlanje ubungohlukanga kweminye. Isitshovutshovu seSuperSport, uTeboho Mokoena, sibeke phambili iqela laso ngokufaka igowuli emzuzwini wesihlanu umdlalo uqalile. Emva koko uVincent Pule uphose ithuba elihle lokulinganisa. Kuyiwe kwixesha lokuphumla iqela likaKaitano Tembo liphambili emva kokuba iPirates ingakwazanga ukumsebenzisa uRonwen Williams ezipalini.
UJosef Zinnbauer uthe akubona ukuba iqela lakhe alibukhalanga, uye wenza iinguqu ezikwazileyo ukuwuphakamisa umdlalo. Ufake uThabang Monare endaweni kaNkanyiso Zungu, wafaka uTerrence Dzvukamanja endaweni kaDeon Hotto obekhe waphatha kakubi iKaizer Chiefs etsala nzima kwezi veki ziphelileyo. Ezimnyama ziye zakelema kwisigaba sesibini. USiyabonga Nhlapo uye wadlalisa kakubi uZakhele Lepasa endaweni embi.
Uyifake ngokwakhe lo bhola uLepasa atsho alingana. Kuthe xa kushiyeke imizuzu emine kuphele umdlalo, uTshegofatso Mabasa ubhakuzelise umnatha – kwathi huu kwiBucs ebilambele amanqaku apheleleyo ebaleni layo. Yena uBradley Grobler akakwazanga ukusebenzisa amathuba abenokuthintela impumelelo yeBucs. Kweminye imidlalo, iKaizer Chiefs ibambene neGolden Arrows ngo’2-2. Izuze impumelelo yokuqala iStellenbosch ngokubetha iChippa United ngo’2-0. Yona iBlack Leopards ibethe iMaritzburg United ngo’1-0.
Pirates: Ofori, Hlatshwayo, Nyauza, Jooste, Maela, Motshwari, Makaringe, Monare, Pule, Hotto, Lepasa.
Amalalela: Mpontshane, Dzvukumanja, Mntambo, Mako, Zungu, Makgaka, Mabasa, Ndlovu, Jele.
SuperSport: Williams, Nhlapo, Fleurs, Kekana, Bhasera, Mbule, Mokoena, Waiswa, Rusike, Rayners, Grobler.
Amalalela: Pule, Khumalo, Phillips, Donn, Moralo, Webber, Mahachi, Lungu, Gabuza.
BUKELA – Usuku lwenkululeko: Izimvo zabantu