Abafana Bes’thende bagoduka bengenaso nesincinci isikrokro emva kokuba beqwangqululwe ngenduku yiMamelodi Sundowns ephumelele ngagowuli amathandathu eqandeni (6-0) emdlalweni weDStv Premiership obubanjelwe eLoftus Stadium emalanga namhlanje. Umdlalo utake iintlantsi zisuka njengesiqhelo xa kudibene la maqela mabini. Kuyiwe kwixesha lokuphumla iSundowns inkqenkqeza phambili ngamagowuli amathathu onke. Igowuli lokuqala lifakwe nguGaston Sirino emzuzwini weshumi elinethoba.
Unikwe elinye ithuba lokuqala umdlalo uSirino emva kokudlala kakuhle emdlalweni iSundowns engombe kuwo iSummerfield Dynamos ngamagowuli amahlanu eqandeni kwiveki ephelileyo. Emva koko, umtshutshisi omkhulu, uPeter Shalulile, ufake amagowuli amabini. Abadlali beGolden Arrows babuye kwisigaba sesibini benethemba lokuzuza nokuba linye igowuli lokubika ekhaya – kodwa wale kwaphela uDenis Onyango ezipalini. Endaweni yoko – iSundowns ibhakuzelise umnatha kwakhona. UShalulile ufake igowuli lakhe lesithathu emva kokuthatha ibhola kuThabani Zuke endaweni embi kakhulu.
UKermit Erasmus noPavol Safranko bafake amanye amagowuli yatsho yatywinwa ibhokisi engcwatywe ngayo iGolden Arrows emdlalweni obusePitoli. Umqeqesho wayo, uLehlohonolo Seema, uzamkele iziphumo zikrakra zinjalo watsho esithi baza kulwela ukungena kwiTop 8 nangona iqela lakhe libethiwe. Ngoku iSundowns iqinisekile ngokukhusela indebe yayo yeDStv Premiership emva kweziphumo zanamhlanje. UShalulile ngumdlali wokuqala ukufika kumashumi amabini amagowuli esizini ukusukela ngo-2012.
Mamelodi Sundowns: D.Onyango, Mudau, Lakay, B.Onyango, Lebusa, Jali, Maluleka, Ralani, Zwane, Sirino, Shalulile.
Amalalela: Pieterse, Mvala, de Reuck, Kapinga, Modiba, Safranko, Maema, Erasmus, Maboe.
Golden Arrows: N.Gumede, Sibisi, Ndlovu, Mantshiyane, Sibiya, Mutizwa, Dlamini, Dube, Conco, Zuke, Mmodi.
Amalalela: Mlungwana, Magubane, Mathiane, Magawana, Mtshali, Nxadi, Ndwandwe, Motebang, M.Gumede.
Iphele njalo indlela yeSundowns kwiCAF Champions League!