Ingene yazinza iLamontville Golden Arrows kwiTop 8 emva kokuzuza amanqaku amathathu emdlalweni wanamhlanje. Oku kwenzeke emva kokuba Abafana Bes’thende bebethe iRichards Bay ngegowuli elinye eqandeni emdlalweni weDStv Premiership obutshisa eKing Zwelithini Stadium. Amanqaku amathathu abathathe Abafana Bes’sthende ababeka kwindawo yesithandathu kwiDStv Premiership. Kanti yona iRichards Bay FC yehlele kwindawo yesixhenxe emva kokuphulukana nomdlalo wayo weshumi kule sizini. Bekunzima emdlalweni, bekucaca ukuba umdlalo lidabi lobukhaya KwaZulu-Natal. IGolden Arrows ibhalise ebhodini kwangoko kwisigaba sokuqala ngebhola entle efakwe ngentloko nguRyan Moon ofumene ibhola ebisuswe ekoneni nguKnox Mutizwa.
Lo nto ibaxhokonxile abadlali beRichards Bay abalwileyo bezama ukufumana igowuli labo lokulinganisa. Kuthe kuse njalo, iRichards Bay igqejwe iduma elingophiyo ngethuba iphulukana no’Abel Mabaso ofumene ikhadi lesibini elityheli elilandelwe lelibomvu elimkhuphe kwaphela emdlalweni obalulekileyo. Umdlalo uye wanzima kwiRichards Bay ngoba ibidlala ngenani labadlali elingaphelelanga. Nakubeni kunjalo, ikwazile ukunyamezela kwade kwaphela isigaba sokuqala kungekho gowuli elifakiweyo yiGolden Arrows ebisilwela ukufaka igowuli lesibini phambi kwexesha lokuphumla. Kwisigaba sesibini, omabini amaqela ebephantsi koxinizelelo ngoba iArrows ibingafuni ukulahlekelwa ngumdlalo usesandleni.
Kanti yona iRichards Bay ibizama ukuphumelela emva kwexesha elide iphulukana nemidlalo. Nakwisigaba sesibini, uSanele Barns ebengoyena mdlali obesoloko eyinkathazo kwiGolden Arrows – kodwa ebefika uSifiso Mlungwana ethe qwa rhoqo ezipalini zakhe. Nangona ingaphumelelanga emdlalweni, iRichards Bay ilwile futhi khange ibanike ithuba lokwenza unothanda Abafana Bes’thende. UVasili Manousakis ufake uLuvuyo Memela emizuzwini yokugqibela endaweni ka’Ovella Ochieng. Ukuphulukana nomdlali yeyona nto eqhokre iRichards Bay emdlalweni wanamhlanje ngaphezulu kwegowulu elifakwe kuyo. Zibekhona iinzame ezenziwe nguMemela – kodwa ngelishwa lakhe, iGolden Arrows ibivale mba emva. Iphumelele kanjalo iGolden Arrows emdlalweni wanamhlanje.
UShongwe uthi phantsi ngemilo, makuveliswe iintshatsheli emanqindini!