Amabutho akhe phantsi isitya sigcwele nangona ibingawo adlale umdlalo oncomekayo. Ekugqibeleni, iWarriors FC yeyona ekwazileyo ukuphumelela umdlalo ngamagowuli amabini kwelinye (2-1) emdlalweni weDStv Compact Cup obushushu ngendlela emangalisayo eMoses Mabhida Stadium ngorhatya lwanamhlanje. Ukuphumelela kwayo iWarriors FC kuthetha ukuthi iza kudibana neCoastal United ebethe iDinaledi FC ngamagowuli amathathu eqandeni emdlalweni wokuqala weDStv Compact Cup. Nangona Amabutho ewe phantsi kwiinzame zawo zokuya kumjikelo wokugqibela weDStv Compact Cup – kodwa ngawona adlale umdlalo ongcono.
Oyena mdlali obe ngumqobo endleleni yaMabutho ibe ngu-Itumeleng Khune – ofumene ithuba elihle lokuvuselela isakhono sakhe sakubamba ezipalini. Isigaba sokuqala siphele iWarriors ihamba phambili ngegowuli elifakwe nguSiyethemba Sithebe – obinze ngomkhonto ekhaya ngempazamo. Amazamile Amabutho ukuhlasela esebenzisa uRitchie, uPeprah noMmondi – kodwa uHappy Jele, uNjabulo Ngcobo noThabo Matlaba bebevale mba. Amaqela abuyele ebaleni kwisigaba sesibini umfutho uthande ukuba phezulwana. Ilelo nelo iqela belifuna ukuphumelela. Abadlali baMabutho, bekhokelwa nguPule Mmodi, bebeyinto ibila kwiWarriors FC ehlangulwe nguKhune amatyeli amaninzi.
Emva kwethuba abadlali bezama, uNkosinathi Sibisi ufake igowuli lokulinganisa. Afumene amandla Amabutho ngakumbi okuhlasela – kodwa umdlalo ude waya ekugqibeleni engakwazanga ukufumana igowuli lempumelelo. Ukungena kukaFortune Makaringe noRuzaighh Gamildein kuwufunqule umdlalo weWarriors FC eye yafumana igowuli elifakwe nguMonnapule Saleng umdlalo usiya ekupheleni. Ngoku iWarriors FC iza kulungiselela ukulwela isigidi sonke serandi xa idibana neCoastal United emdlalweni wokugqibela kwiveki ezayo.
Warriors: Khune, Njabulo Ngcobo, Mako, Jele, Matlaba, Lorch, Nkosingiphile Ngcobo, Blom, Hotto, Dolly, Peprah
Amabutho: Mothwa, Xoki, Sibisi, Ritchie, Dube, Memela, Qalinge, Potsane, Claasen, Letoalo, Mulenga.
UZizi Kodwa ufuna ulawulo olungenachaphaza kwiBoxing SA!