Iqela leMpuma Koloni elidlala kwiPremier Soccer League, iChippa United, lidlulele kumjikelo wesibini kwiMTN 8 okokuqala emva kokubetha iPlatinum Stars ngo’2-0 kumdlalo obubanjelwe eRoyal Bafokeng Stadium emvakwemini namhlanje.

URhulani Manzini, ifolosi ethembekileyo kwiChippa United kule mihla, ufake igowuli kwisiqingatha sokuqala somdlalo kwathula kwathi cwaka. Elesibini, elesiqinisekiso, lifakwe ngumdlali oze ngobus’ezweni – uThembinkosi Lorch, ekuzeni kuphela komdlalo.

Akuqhelekanga ncam ukubethwa kwePlatinum Stars enkundleni yayo kolu kwiMTN 8 ngoba yeyona ndebe le eyidlala kakuhle. Umdlalo wayo khange udibane kakuhle kwaphela – lo nto ikhokelele ekubethweni kwayo iPlatinum kulo mdlalo yiChippa eye eRustenburg ifuna into enye qha – impumelelo. Ukaputeni, uVuyo Mere, akakwazanga ukufihla ukuphoxeka kwakhe emva komdlalo watsho ehlaba ikhwelo koogxa bakhe ekudala bedlalela iPlatinum ngelithi mabanyuse iikawusi.

Naye uCavin Johnson ucule iculo elinye. “Yah, asidlalanga kakuhle konke konke kulo mdlalo. Umdlalo wethu ubuthe saa,” utshilo uJohnson.

Ngoku iiChilli-boys zibuyela ekhaya imisila iphezulu emva kwale mpumelelo ibaluleke kangaka. Umqeqeshi wazo uyaziwa ngokuthanda umdlalo ocacileyo – akaxolanga ngumdlalo wazo noxa ewuqonda unobangela walonto.

“Ngelishwa namhlanje, siqale ukudlala ngendlela yethu eqhelekileyo ixesha selihambile. Phofu ndiyayiqonda lo nto yenziwa kukuba abadlali basazibambile ngoba zange badlulela kwisigaba abakuso ngoku kwiMTN 8. Ngaphandle kwale mpumelelo, ndifuna kwaneliseke abalandeli,” utshilo uMalesela kudliwano-ndlebe kumabonakude.

UMaselela uneenjongo ezintle nezicacileyo ngeli qela aliqeqeshayo. Emva kokuba iChippa ivale isizini yePSL ka’2015/16 – uDan Dan wathi ufuna ilwele iindebe kule sizini entsha. Isekhondweni elihle okwangoku iChippa – kodwa eyona nto ayifuna kakhulu ngoku ngumqeqeshi ngumdlalo owonwabisa abalandeli nowahlukileyo kwamanye amaqela adlala kwiPSL.

“Akufuneki sidlale ibhola ngokungathi kukho into esiyoyikayo. Ukudlisela kwabadlali ngezakhono ebaleni ayonto ekufanele siyothuke ngoba abadlali bethu benza into ekufanele yenzeke kwibhola yoMzantsi Afrika. Sisiqalo esi, ndiyathembisa iqela lizakuphucuka ngokuhamba kwexesha,” uvale ngalo mazwi uMalesela.