Iqela leDStv Premiership, iKaizer Chiefs, lingahlawuliswa kanobom emva kokungaziphathi kakuhle kwabalandeli balo emva kokuphosa izinto ebaleni ngethuba eli qela libethwa kumdlalo wedabi laseSoweto neOrlando Pirates eFNB Stadium ngoMgqibelo umhla we9 kweyoKwindla.
Kumdlalo obulindelwe ngabomvu obudlalelwa eFNB Stadium ngoMgqibelo, iPirates ibuye ngeyona ndlela imangalisayo emva kokubuya ngasemva iphumelele ngo’3-2.
Kumdlalo ubuvutha iintlantsi, uMonnapule Saleng ube liqhawe leqela likaJose Riveiro, ngokufaka amagowuli abalulekileyo amabini.
Nangona kunjalo, emva komdlalo kuye kwakho isiphithiphithi kubalandeli beChiefs, ababonakalise ukudana ngokugibisela abadlali nabasebenzi ngezinto.
Lo mbhodamo wabalandeli ungakhokelela kwiziphumo ezibi kwiqela, kuquka isohlwayo seR300 000, kwaye kunokwenzeka umdlalo wabo olandelayo wasekhaya neStellenbosch udlalwe ngaphandle kwabalandeli.
Lo mba ngoku ulele kwikomiti yoluleko yePSL, ezakudibana ukuze ihlole esi sehlo kwaye imisele izohlwayo ezifanelekileyo.
Xa ebuzwa ngesiphithiphithi esenzeke emva komdlalo, umqeqeshi weChiefs, uCavin Johnson, uqale wabubetha ngoyaba ubunzulu bemeko kodwa waphela evuma ukuba izinto azizange zibe ntle.
“Mhlawumbi ndibone ibhotile enye okanye ezimbini,” uye watsho.
“Ndiye ndawabona amapolisa. Andazi ukuba bebekhusela bani, mna okanye abadlali. Musani ukugibisela amatye, ayisebenzi loo nto. Ndicinga ukuba bekuya kuba njalo noba besinamagowuli amathathu kwaye iPirates inamabini. Mhlawumbi obuzakubona kugityiselwa namatye,” utshilo uJohnson kudliwanondlebe lwakhe noonondaba emva komdlalo.
UJohnson uphinde wayucwa ngunozinti uBrandon Petersen obenomsindo emva komdlalo.
“Yinto eqhelekileyo le. Ndifuna abadlali bam baveze izimvo zabo xa singaphumeleli kumdlalo. Ndifuna babelane ngeemvakalelo zabo, kwaye ukuba bayandixelela indlela abaziva ngayo – ndizakuyibeka emagxeni am yonke loo nto kuba kwixesha elizayo ndiya kulungisa nayiphi na into efuna ukulungiswa. Yibhola ekhatywayo ke leyo,” utshilo uJohnson malunga nesiganeko noPetersen.
Ngaphandle kweziganeko ezenzeke emva komdlalo, idabi ibinika umdla kubabukeli abangaphaya kwamashumi asibhozo amawaka (80 000) abebegcwele ibala lemidlalo nezigidi zabanye abebebukele koomabonakude babo. Bekusele kulithuba abalandeli bebukele umdlalo wedabi ovelisa amanqaku amahlanu.
UShongwe uthi phantsi ngemilo, makuveliswe iintshatsheli emanqindini!