Izuze impumelelo ebalulekileyo iMamelodi Sundowns emva kokuba iquthise iTP Mazembe ngegowuli elinye emdlalweni weCAF Champions obubanjelwe eLucas Moripe Stadium emalanga namhlanje. UPeter Shalulile uweze iSundowns ngepenela ayifake emva kokuwiswa kukaLucas Ribeiro emhlabeni kanozinti emzuzwini wamashumi amathathu anesibhozo kwisigaba sokuqala somdlalo. Impumelelo yanamhlanje ibeke iMamelodi Sundowns kwindawo yokuqala kwiGroup A.
Emva kokusukelana kwisigaba sokuqala, kuyiwe kwixesha lokuphumla iSundowns inkqenkqeza phambili ngegowuli elinye eqandeni. Sisiqalo iTP Mazembe ebingasifuni njengeqela elidlalela kude nekhaya. Injongo yayo ibikukuvala ide ifumane igowuli kwangoko emdlalweni. Ngelishwa layo, uLucas Ribeiro ufumene ipenela emva kokuba ewiswe emhlabeni kanozinti. UPeter Shalulile khange enze mpazamo, uyibeke emnatheni ibhola yatsho yahamba phambili iSundowns.
Emva kokufakwa kwegowuli kuyo, iTP Mazembe izamile ukuhlasela isebenzisa amaphiko. UGrant Kekana noMosa Lebusa bavale amazibuko amatyeli aliqela izama ukufumana igowuli lokulinganisa iTP Mazembe yaseDemocratic Republic of Congo. Nakubeni umdlalo udlalwe phantsi kwengqatsini yelanga eLucas Moripe Stadium – kodwa abadlali bakwazile ukuvelisa umdlalo onomtsalane phambi kwenani elihle noko labalandeli. Njengeqela ebelidlalela ekhaya, iSundowns yiyo ebinamandla kakhulu emdlalweni.
Omabini amaqela angene kwisigaba sesibini efuna amagowuli, ingakumbi iTP Mazembe ebihamba emva. Emva kweshumi lemizuzu kwisigaba sesibini somdlalo, uRulani Mokwena wenze iinguqu eziliqela. Ufake abadlali abahlaselayo abafana noThapelo Morena noThembinkosi Lorch. Okubalulekileyo kwiSundowns ibikukuqinisekisa ukuba iTP Mazembe, ezamileyo kwisigaba sesibini, ayicholi naphantsi. Umdlalo uye wasongwa iMazembe ingakwazanga ukufumana igwouli.
Lusashaqekile uluntu lwaseNgqushwa sisithwakumbe sokusa kubhubhe umntu wonke emzini!