Phambi
kokuqala kwesizini yePSL ka-2019/20, uFortune Makaringe wenza isithembiso
kumqeqeshi weKaizer Chiefs, uErnst Middendorp. Oku kudizwe nguMiddendorp
ngethuba encokola neentatheli kwindibano ebibanjelwe eGoli. UMakaringe ngomnye
wabadlali abatyikitywa yi-Orlando Pirates kunyaka ophelileyo besuka
kwiMaritzburg United. Njengokuba abalandeli bebhola eMzantsi Afrika beza
kubukela owona mdlalo omkhulu xa kudibana iPirates neChiefs emdlalweni we-Absa
Premiership emalanga ngoMgqibelo, uMiddendorp uye wakukhumbula ukuphoxwa kwakhe
nguMakaringe owayemfuna kuba ngoku engomnye wabadlali bePirates ekulindeleke
bayisokolise iChiefs. Nakubeni ese nesigqukru okaMiddendorp – kodwa uyayincoma
indlela edlala ngayo uMakaringe ukusukela oko efikile kwiPirates. “Yah..Udlala
kakuhle. Baninzi abadlali abasengqondweni yam. Ayinguye yedwa uMakaringe; kukho
abanye abadlali abafana noSiphesihle Ndlovu noDumisani Zuma abakwazileyo
ukufumana amathuba okudlala ibhola kwiPSL,” utshilo uMiddendorp.
UMakaringe
ukhe wangundaba-mlonyeni kulo nyaka emva kokwenza amathayi-thayi ngebhola
emdlalweni owawuphakathi kwePirates neMamelodi Sundowns. Abalandeli bebhola
bayithanda kakhulu lo nto ngoba yinto abayizo – kodwa uPitso Mosimane wayigxeka
kakhulu. Ukuya eTalashishi kukaMakaringe endaweni yokuya eNiniva kwamkhubekisa
uMiddendorp. “Ndisakhathazekile nangoku sisigqibo esathathwa nguMakaringe
ngenxa yokungasihloniphi isithembiso awasenzayo ekuqaleni kwesizini. Wayekade
engumdlali ongaqoqoshekanga esaqala ukudlala kwiMaritzburg – kodwa ungumdlali
ophucukileyo ngoku emva kokufumana uqeqesho kubaqeqeshi abaliqela. Ungumdlali
oqaqambileyo ngoku ongadlalela neqela lesizwe. Isigqibo awasithathayo
siyamnceda ngoba uqhuba kakuhle apho akhoyo. Endinokwenza ngoku kukumncoma
ngoba umsebenzi wethu baqeqeshi kukubabonisa indlela abadlali,” utshilo
uMiddendorp ophantsi koxinizelelo nangona iChiefs iphezulu kwi-Absa
Premiership.
Iphele njalo indlela yeSundowns kwiCAF Champions League!