Umqeqeshi uyifun’ingoompetha behlabathi iMamelodi Sundowns Ladies!

Umqeqeshi weMamelodi Sundowns Ladies, uJerry Tshabalala, uvakalise ukonwaba kwakhe emva kwempumelelo ezuzwe liqela lakhe kutshanje. OkaTshabalala uthethe neentatheli eGoli kwiveki ephelileyo emva kokuba iSundowns Ladies ithweliswe isithsaba seCAF Women’s Champions League okwesibini.

Amasandawana abethe iSporting Club Casablanca ngamagowuli amathathu emdlalweni wokugqibela obuseKorhogo, e-Ivory Coast. Ukuphumelela kwayo iSundowns Ladies kubethelele indawo yayo enkcochoyini yebhola yezwekazi le’Afrika.

Emva kokusekwa kweCAF Women’s Champions League eminyakeni emithathu edlulileyo, iSundowns iyithathe kabini indebe. Njengokuba iDowns Ladies igqugqise yonke iAfrika, ngoku umqeqeshi uthi ufuna igqugqise kwihlabathi.

“Emva kokuqeshwa kwam yiSundowns, ndathi ndiza kuyenza oompetha bebhola ekhatywayo kwizwekazi le’Afrika yonke,” utshilo uTshabalala, owongeze ngelithi ufuna ukulivavanya iqela lakhe kwiFIFA Women’s Club World Cup. “Namhlanje siziintshatsheli ze-Afrika – kodwa ndinomnqweno wokuzivavanya koompetha behlabathi.

“Sikwindawo yamashumi amabini anesihlanu kumanqwanqwa ehlabathi, ngoku ndingxamele ukubhengezwa komhla weClub World Cup. Sifuna ukuzivavanya namanye amaqela asuka kwamanye amazwe sizokwazi ukubona ukuba umgangatho wethu indawoni na xa uthelekiswa namanye amaqela ezinye izizwe. Ekuqaleni, into yokukhula kweSundowns Ladies yayingumnqweno nje – kodwa ngoku sifuna ibe liqela eliphambili ebholeni ekhatywayo kwihlabathi lonke,” utshilo uTshabalala.

Emva kwetumente, abadlali beSundowns bazithaphulele amawonga aphambili. UBoitumelo Rabale uye wangumdlali wetumente, uAndile Dlamini wangunozinti wetumente waze yena uRefilwe Tholakele ube ngoyena mdlali onamagowuli amabininzi.

UDlamini ubalule ukusebenzisana njengeyona nto ebanike amandla okuphumelela nakubeni abadlali abaninzi bebengekho ngenxa yokonzakala. “Wonke umntu ubalulekile eqeleni lethu. Baninzi abadlali abonzakeleyo, besidlalela bona eKorhogo. Into emnandi ngeSundowns kukuba ukuphumelela yinkcubeko yethu,” utshilo uDlamini.