UVincent Pule ungene wahlangula iPirates kumdlalo weTelkom Knockout

AmaBhakabhaka
ancume olukabhulankethe emva kokuba iqela labo likwazile ukudlulela kumjikelo
olandelayo weTelkom Knockout. UVincent Pule ufake igowuli elincede i-Orlando
Pirates ukuze ibethe iChippa United ezixhwitheleyo nayo kumdlalo weTelkom
obubanjelwe e-Orlando Stadium ebusuku namhlanje. Ukuphumelela kwePirates
kusondeza iphupha likaMilutin “Micho” Sredojevic lokuphumelela indebe kwisizini
yakhe yesibini njengomqeqeshi weZimnyama. Abadlali beChippa United bakwazile
ukubambelela emdlalweni nakubeni kubekho imbambano phakathi kuka-Eric Tinkler
noMark Mayambela oye wakhutshwa emdlalweni phambi kokuphela kwesiqingatha
sokuqala ngenxa yomdlalo wakhe obungancumisi.

Isiqingatha
sokuqala siphele kungekho nelinye iqela elifake igowuli. Umdlalo ube mhle
zisuka emdlalweni nangoba uye wehle ekuhambeni kwexesha. IPirates inkqonkqoze
kuqala isebenzisa abadlali bayo abanamendu abafana neJustine Shona, uAugustine Mulenga
noThembinkosi Lorch ngelizama ukufumana igowuli kwangoko emdlalweni. Ilinge layo
aliphumelelanga ngoba unozinti weChippa, uDaniel Akpeyi, uzivale zonke iibhola
ebezijoliswe kuye ziifolosi zeBucs. Nakubeni iChippa United ibiphantsi
koxinizelelo ubukhulu becala emdlalweni – kodwa ikwazile ukudlala kakuhle,
ngakumbi emva apho ikhonkxe iifolosi zePirates. UThabo Rakhale noKurt Lentjies
bakhe bazama ukungena emhlabeni wePirates – kodwa uHappy Jele noMarcelo Da
Silva batshayele kwanto ebiphambi kwabo. Umqeqeshi weChippa, uEric Tinkler,
ufake uDaine Klate endaweni kaMark Mayambela obengenalo ulwamvila kwisigaba
sokuqala somdlalo.

Umqeqeshi weBucs,
uMilutin Sredojevic, ufake uVincent Pule kwisigaba sesibini somdlalo emva
kokuba iqela lakhe lingakwazanga ukufumana igowuli nangona amathuba ebekhona. Emva
kokuhlaselana izihlandlo eziliqela, iPirates ibhalise ebhodini kumzuzu
wamashumi amathandathu. Igowuli lokuqala emdlalweni lifakwe nguPule emva
kokudibana nebhola ephoswe nguDaneil Akpeyi isuka kuXola Mlambo ekunene. Ibhola
ebibekwe phantsi emhlabeni wePirates, ikhatywe nguKlate – kodwa itye yaqabela
phezu kwepali. Emva kokuhamba emva kweChippa, uTinkler wenze iinguquu zabadlali
abathathu ngelizama ukukhangela indlela yokufumana igowuli lokulinganisa. URuzaigh
Gamildein utsale imbumbulu yebhola ekude – kodwa iye yabhabha phezulu. UMusa Nyatama
ukhutshiwe ngenxa yokonzakala. Endaweni yakhe kungene uMpho Makola onethuba
elide engasadlaliswa nguMicho. Kwimizuzu yokugqibela izamile ukuya phambili
iChippa United – kodwa iibhola zabadlali azenzanga nto.

Orlando Pirates: Jackson Mabokgwane, Abbubaker Mobara, Marcelo
Da Silva, Happy Jele, Innocent Maela, Xola Mlambo, Ben Motshwari, Musa Nyatama,
Justine Shonga, Thembinkosi Lorch, Augustine Mulenga.

Chippa United: Daniel Akpeyi, Prederic Nsabiyumva, Zitha
Macheke, Thabo Rakhale, Thamsanqa Sangweni, Tercious Malepe, Tebogo Thlolane,
Mark Mayambela, Ruzaigh Gamildein, Kurt Lentjies.