Omnye wabadlali abaziwayo embhoxweni jikelele, uMakazole Mapimpi, kuvakala iindaba ezithi uzakube edlalela iCheetahs umdlalo wakhe wokugqibela kwitumente yePRO 14.
Le ndedeba eyazalelwa kwidolophu yaseMonti isendleleni esingise kwiqela elikhulu laseThekwini, iSharks, elilungiselela ukudlala kwitumente enkulu kwihlabathi – iSuper Rugby.
UMapimpi ukholelwa ukuba wenza impazamo ngokutyikitya isivumelwano-ngqesho kwiCheetahs eyaguzulwa kwiSuper Rugby kunyaka ophelileyo kuhlengahlengiso olwenziwa kumbutho olawula umbhoxo wamaqela aseMzantsi Afrika.
“Mna ndandikhangela iqela elizakudlala kwiSuper Rugby emva kokuba ndeva amahum-hum ayesithi izakudendwa iSouthern Kings. Sasikhangela nje iqela endinokulidlalela nabaphathi bam. Sasingazi ukuba zizakudendwa neCheetahs,” utshilo okaMapimpi.
UMapimpi, 27, wayengomnye wabadlali ababenkqenkqeza phambili ngokulala emgceni kwitumente yeSuper Rugby xeshikweni edlalela iqela laseMpuma Koloni elathotyiselwayo iSouthern Kings kunyaka ka-2017.
Nangona wayengakucwangcisanga ukuba yinxalenye yeqela elizakudendwa kwiSuper Rugby, uMapimpi uyibulele iCheetahs.
“Ndiyalibulela ithuba endilinikwe leli qela. Ininzi into endiyifundileyo ngokudlalela lona,” utshilo uMapimpi.
ICheetahs iqubisana neSouthern Kings kumlenze wesibini kumdlalo wePRO 14.
Ziwuphumelele ngo’45-21 umdlalo wokuqala iCheetahs owawubanjelwe eNelson Mandela Bay Stadium, kwisixeko saseBhayi.
La maqela azakungquzulana kwibala iToyota Stadium, eBloemfontein, ngentsimbi yesihlanu ngoMgqibelo wale mpelaveki.
UMapimpi ubabulele kakhulu abalandeli bakhe nathe badlala indima enkulu kakhulu ebomini bakhe.
“Into endiyiqapheleyo kukuba baninzi abantu abandixhasayo kule ndlela. Ndiyababulela kakhulu ngoba le nto bayenzayo ibalulekile kakhulu ebomini bam,” uvale ngalo mazwi uMapimpi.
isibhalo@inl.co.za
BUKELA – Usuku lwenkululeko: Izimvo zabantu