Amabhaka-bhaka akakwazanga ukuyoyisa iMaritzburg United kumdlalo we-Absa Premier Soccer League odlalwe phantsi kweemeko enzima ngenxa yobumanzi eHarry Gwala Stadium. ITeam of Choice nePirates zibambene ngeqanda macala kumdlalo wanamhlanje emva kokungakwazi ukusebenzisa uthotho lwamathuba. Ezimnyama ziye eMgungundlovu ukuzithemba kuphezulu emva kokubetha i-Ajax Cape Town ngo’1-0 kumdlalo ogqithileyo e-Orlando Stadium ekuqaleni kwale veki. Enkundleni yayo, kusoloko kunzima ukuyibetha iMaritzburg United, ngakumbi amaqela amakhulu – nalapha phantsi kukaFadlu Davids kuse njalo. Unozinti wePirates, uWayne Sandilands, unqande amanzi engena endlini amatyeli aliqela emdlalweni kwizigaba zozibini abadlali beMaritzburg befun’intwibilapha.
Nabo kwelabo icala abadlali beBucs bebengayekanga ukuhlasela. Bangcangcazelise umnatha kwade kwakabini kulo mdlalo – kodwa omabini loo magowuli akavunywanga ngusompempe. UThamsanqa Gabuza noMorrison bazamile ukutyhala phaya phambili – kodwa kuye kwacaca okokuba bafikele ebantwini abebekulungele ukuqubisana nazo zonke iingxaki. UMilutin Sredojevic uvumile ukuba umdlalo ubungelulanga kwaye uyayincoma indlela abadlali bakhe abadlale ngayo. uDavids kwelakhe icala ulamkele inqaku elinye ngoba iqela lakhe lisahleli phezulu emva kokuqokelela amanqaku asixhenxe emva kokudlala imidlalo emine kule sizini ka-2017/18.Yona i-Ajax Cape Town ifumene impumelelo yayo yokuqala kule sizini ngokubetha iPolokwane City ngo’2-0 kumdlalo obuseParow namhlanje ebusuku.
Maritzburg United: Ofori, Sanoka, Xulu, Fransman, Weidlich, Shandu, Mekoa, Ndlovu, Maboe, Kunene, Rusike.
Orlando Pirates: Sandilands, Mobara, Jele, Nyauza, Maela, Dube, Matlaba, Nyatama, Morrison, Qalinge, Gabuza.
BUKELA – Usuku lwenkululeko: Izimvo zabantu