Ngaphandle kwamathandabuzo kuzawudlan’ iintsimbi xa kudibana iChippa United neKaizer Chiefs – oomakade ezondana kwibhola ekhatywayo eMzantsi Afrika. La maqela mabini azakuvana amandla kumdlalo wokuqala wePremier’s Cup ngo’15:00 eSisa Dukashe Stadium ngoMgqibelo. Le yitumente yokuqala ezakudlalwa egameni leNkulumbuso yeMpuma Koloni ibambisene neBuffalo City Municipality. Namhlanje amaqela amanyiweyo athethe neentatheli kwiinkomfa ebizinyaswe nguSodolophu, uXola Phakathi, usihlalo weChippa United, uSiviwe Mpengesi, uMark Mayambela, uSiphiwe Tshabalala nosithethi seChiefs, uVina Maphosa.
Kule nkomfa kuthiwe thaca onke amalungiselelo alo mdlalo ujongwe ngamehlo abomvu ngabo bonke abachaphazelekayo kuquka nabadlali abazakube bebukelwe ngabantu abaphaya kwishumi elinesine lamawaka eSisa Dukashe Stadium. Usodolophu weBCM uthethe wenjenje: “Siyanamkela nonke kwisixeko sethu iBuffalo City. Nakukhumbula ukuba iChippa United yathatha isigqibo sokusebenzisa iBCM njengekhaya layo lesibini. Sibenenyhweba yokufumana imidlalo eliqela. Siyakuvuyela ukwamkela amaqela afana neKaizer Chiefs. Kwicala alamalungiselelo ndingatsho ukuba konke sekume ngobume. Amatikiti singeva kusithiwa aphelile ngomso. Xa ephelile ke amatikiti siyabacela abantu babukele kumabonakude ngoba asifuni kubekho ingxaki.”
Yena uMpengesi uthethe wenjenje: “Ndifuna ukuthatha elithuba ndibulele usodolophi ngoba oko bathi (benguMasipala) basizisa apha singatsho ukuthi sineqela laseMpuma Koloni. Ndiyayibulela neNkulumbuso ngoba ibhola yinto ebalulekileyo futhi ebadibanisayo abantu. Yinto enkulu kuthi ukuza kweChiefs apha eMdantsane. Ndibaxelele abadlali bam ukuba le ndebe mayingahambi ke kweli phondo. Sizimisele ukudlalisa abadlali bethu abatsha esicinga ukuba bazakusinceda kule sizini izayo. Sikulungele ngokupheleleyo ukusingatha le tumente kwaye siyathemba asube sigagane nengxaki eyehle kwiCarling Black Label Cup kwiveki ephelileyo.”
UMark Mayambela – osandula ukubuyela kwiChippa United kutshanje – nguye obethetha egameni leeChilli Boys eziyisokolisayo rhoqo emidlalweni iChiefs. “Iqela lifuna ukwenza izinto kule isizini, ndiyavuya ke ukuba yinxalenye yeqela elinjalo. Kuliwonga kum kakhulu ukuba yinxalenye yetumente ebaluleke ngolu hlobo,” utshilo uMayambela.
Kanti yena uSiphiwe Tshabalala uthethe wenjenje: “Amalungiselelo wethu esizini ahamba kakuhle. Ukuzothi ga ngoku sesiphumelele iindebe ezimbini. KwiChiefs asinawo umdlalo wobuhlobo. Umdlalo ngamanye siwuthathela ingqalelo, sizakudlala kule tumente ngoba iChiefs liqela labantu. Sizakudlala neqela elizimiseleyo, lo nto ibonakaliswa nangabadlali elibathengileyo. Sizimisele ukudlalela ukuphumelela, uxolo nolonwabo kulo mdlalo.”
Isithethi seNkulumbuso, uSonwabo Mbananga uthe bazimisele ukusebenzisa imidlalo njengeqhinga lokudibanisa abantu abatsha nokubasusa kwizinto ezimbi. “Urhulumente uneenkqubo zophuhliso azilungiselela ulutsha lonke kweli phondo esebenzisana namaziko aphakamileyo emfundo afana neNelson Mandela University. Imidlalo ke yenye yendlela esizakuzisebenzisa ukugqithisa imiyalezo yethu eluntwini. Sinethemba lokuba oosomashishini bazakuthi baxhamle kangangoko – kodwa sizimisele ukuhlala phantsi neBCM noosomashishini ukuze sijonge iindlela abanokuthi baxhamle ngayo nakwixesha elizayo.
BUKELA – Usuku lwenkululeko: Izimvo zabantu