“Kuzalisekiswa iphupha likaCoetzee ngomso”

Emva kwemini ngomso kuzakube kuzalisekiswa iphupha lomdlali ophambili xa uMzantsi Afrika ingquzulana neFrance. Lo mfo ogama lingu-Andries Coetzee uzakuba yinxalenye yeSpringboks ekulindeleke senze imbali kumdlalo wovavanyo wesithathu ngomso kwibala elinembali etyebileyo kumdlalo wombhoxo, i-Ellis Park Stadium. Iqela lesizwe loMzantsi Afrika liya kulo mdlalo lizithembile emva kokubetha iFrance kwimidlalo emibini ePitoli naseThekwini ngokulandelelana.

Kuye uCoetzee yinto enkulu ukudlalela kule nkundla iSpringboks esaphumelela kuyo indebe yehlabathi ngo-1995. Kwangaxeshanye, uCoetzee uzakube edlala umdlalo wesithathu wovavanyo njengomdlali weSpringboks. “Bendingasoze ndikholelwe ukuba bekukho ubani obendixelela ekuqaleni kwalo nyaka ukuba ndakube ndidlalela iiBoks apha e-Ellis Park kule nyanga yeSilimela. Ndiyambulela umqeqeshi, u-Allister Coetzee, ngokundixhasa nokukholelwa kum,” utshilo uCoetzee obegcoloda luvuyo.

“Ibisoloko iliphupha lam ukusukela ekukhuleni kwam ukudlalela uMzantsi Afrika kweli bala. Utata wama wayesoloko endibiza ngegama elithi “Bokkie encinane”. Ngoku ndiyiBoki enkulu; iphupha lam liza kuzalisekiswa.”

UCoetzee ngomnye wabadlali abasebenze ngokuzimisela okukhulu kwimidlalo yovavanyo edlulileyo kwaye akazimiselanga kutshintsha nto nakulo wangomso umdlalo. “Akukho nto ndizakuyitshintsha, mhlawumbi ndiza kubukela imidlalo-bhanyabhanya kumabonakude ndenze nezinye izinto ezinokuthi ziphazamise ingqondo yam phambi komdlalo. Amalungiselelo omdlalo ame kakuhle ngoku,” utshilo uCoetzee.

“Ndizimisele ukunyusa umgangatho womdlalo ngomso. Ukubetha iFrance kathathu ingayinto entle leyo. Sizimisele ukuyizama lo nto ngoba amajita ayayifuna. Utata wam uthe kum mandidlale ngendlela yam kwaye ndiyazi ukuba ndiwuzolele lo mdlalo; yonke into izakuhamba ngendlela,” uvale ngalo mazwi uCoetzee.