Aphinda etshatshalazeni amaqela aphambili eMzantsi Afrika! ISuperSport United idibana ne-Orlando Pirates kumdlalo wamagqibela kangqoyi weNedbank Cup ngo’20:00 eMoses Mabhida Stadium ngoMgqibelo. ISuperSport yanqunqela egoqweni iPirates ngamagowuli amathandathu kwelinye kumdlalo wePSL kunyaka odlulileyo. Eli qela likaStuart Baxter laphakamisa indebe yeNedbank emva kokubetha eZikamagebhula ngo’3-2 kunyaka ophelileyo. UBaxter uyifumene okwesibini le nde emva yokubamba ngethuba eqeqesha iKaizer Chiefs ngo-2013.
Ezimnyama zayiphumelela le ndebe ngo-2014 emva kokubetha iBidvest Wits ngo’3-1 eMoses Mabhida Stadium. INedbank Cup ibhiyozela iminyaka elishumi yasekwayo kwaye omabini la maqela ayiphumelele kabini le ndebe futhi kokwethoba kudlalwa umdlalo kamagqiba kangqoyi kwibala laseThekwini. Amatsatsantsa a Pitori lizakube lidlalela ukuphumelela njengokuba uBaxter ezakube ewaqeqesha okokugqibela. Kulo mdlalo iSuperSport izakube isithi ndlela-ntle kuStuart Baxter ongumqeqeshi weBafana Bafana.
ISuperSport isemandleni ngoba ayikwazanga ukuphumla ngenxa yokuxakekiswa yimidlalo yeCAF Confed Cup eqhubekayo. Unozinti weSuperSport, uRonwen Williams, uthe lo umdlalo bajonge ukwenza kakuhle kodwa okubalulekileyo kakhulu kukuthi ndlela-ntle kumqeqeshi wabo ohambayo. IPirates idlalalela ukuquma ihlazo lesizini engahambanga ngokwezicwangcwiso zayo kwimbali yePSL. Iyaqala ukungangeni kumaqela asibhozo aphezulu azakuthatha inxaxheba kwiMTN8 kwisizini ezayo. Abantu abaninzi bazakuthi iPirates ibuthuntu njengoba sekuphele inyanga ingadlali kodwa ukapteni weBhakabhaka, u-Oupa Manyisa, uthe bebethe gqolo ukudlala imidlalo yobuhlobo kwaye bezilolonga nzima.
BUKELA – Usuku lwenkululeko: Izimvo zabantu