UVarane noGriezmann bayibeke endaweni entle iFrance

Emva komdlalo,
umqeqeshi weFrance, uDidier Deschamps, uphakamisele phezulu inqindi njengophawu
lovuyo emva kokuba abadlali bakhe bekwazile ukuphumelela umdlalo obalulekileyo.
Amagowuli afakwe nguRaphael Varane no-Antoine Griezmann ayibeke kumjikelo
ophambi kwamagqibela kanqoyi emva kokubetha ilizwe lase-Uruguay ngo’2-0
kumdlalo oqale ngesantya esiphezulu eNizhny Novgorod Stadium namhlanje. Ukuqhuba
kakuhle kweFrance emdlalweni namhlanje zindaba ezimnandi kubalandeli bayo
nakwiqela ngokubanzi – ingakumbi kuDeschamps onethemba lokugoduka etyathe
indebe okwesibini emva kokukhokela iFrance eyagqugqisa kwindebe yehlabathi
ngo-1998.

Abadlali be-Uruguay
bakwazile ukuxhathisa nokuthembisa ekuqaleni komdlalo. UHugo Lloris weFrance
uye wanyanzeleka anqande amanzi engena endlini ngathuba lithile – kodwa kuthe
ngokuhamba kwexesha, iFrance iye yasibamba isingqi sayo ilawulwa nguPaul Pogba
esiswini. Ukungabikho kuka-Edinson Cavani, oncede ilizwe lakhe, i-Uyuguay,
ngethuba ibetha iPortugal kumdlalo ogqithileyo, kuye kwabonakala ngoba noLuis
Suarez ebengabonakali kuba ebegadiwe kakhulu futhi kungekho bhola ayifumeneyo. Kuyiwe
kwixesha lokuphumla iFrance ihamba phambili ngegowuli elifakwe nguVarane
ngentloko, ufumene ibhola entle ebisuka kuGriezmann.

Kwisigaba sesibini
i-Uruguay izamile ukulungisa umdlalo wayo futhi ihlasela – kodwa iinzame
zabadlali bayo azizanga nanto. UGriezmann uvuthulule intambula ethe qelele
kumhlaba kanozinti – ihleli emnatheni emva kokubhutyuzwa nguFrenando Muslera
kwatsho kwacima izibane kwi-Uruguay. Uphelile umdlalo i-Uruguay ingakwazanga
ukufumana amagowuli. Ngalo ndlela, yaba kukuphuma kwawo kwindebe yehlabathi. Kwelinye
icala, iFrance ibe lilizwe lokuqala elizibekele indawo kwimidlalo ephambi
kwamagqibela kankqoyi.

France: Hugo Lloris, Lucas Hernandez,
Raphael Varane, Benjamin Pavard, Corentin Tolisso, Ngolo Kante, Antoine
Griezmann, Paul Pogba, Kylian Mbappe, Olivier Giroud.

Uruguay: Fernando Muslera, Diego Laxalt, Diego Godin,
Jose Gimenez, Martin Caceres, Rodrigo Bentancur, Matias Vecino, Lucas Torreira,
Nahitan Nandez, Cristhian Stuani, Luis Suarez.