Kuncunywe macala onke kwiCape Town City

Ngethuba uJohn Comitis ethenga iMpumalanga Black Aces kwiminyaka egqithileyo, akukho mntu owakhe wacinga ukuba iqela lakhe lingakhula ngendlela elikhule ngayo ngoku.

Umsebenzi omhle awenzileyo ufanelwe kukunconywa. Into ecacileyo ngoku yeyokuba bazakuswantsulisana namaqela amakhulu eMzantsi Afrika.

ICape Town City yaphumelela iTelkom Knockout phantsi kuka-Eric Tinkler kwisizini yokuqala yagqibela ngobamba indawo entle kwiPSL ekupheleni kwesizini.

Emva kwakhe kungene uBenni McCarthy – emtsha esuka kuqeqesho eYurophu, uthathe iCity wayibeka kwiTop 8 walwela nendebe efika.

Iincwadi zembali yebhola zibhalwe ngokutsha emva kokuba iCity iphakamise iMTN 8 Cup okokuqala.

Lo nto yenzeke emva kokubetha iSuperSport United ngo’4-1 kumapenela kumdlalo obunzima ophele iliqanda macala, eMoses Mabhida Stadium.

Ukuphumelela kweCity kuqinise iinzame zayo zokulwela eyona ndebe enkulu eMzantsi nokuya kwimidlalo yezwekazi le-Afrika. Impumelelo imfunqule naye uMcCarthy njengomqeqeshi ngoba ngoku unento ayikhombayo.

Kuncunywe macala kwiCitizens ngoba njengokuba uComitis evuyela izigidi ezisibhozo zerandi (R8-million) – kodwa nabo abadlali bakhe bancumile ngoba ubaqinisekisile ukuba baza kwabelana ngezigidi ezine zonke zerandi (R4-million).

“Abadlali baza kufumana isiqingatha semali. Siqhuba njalo xa siphumelele indebe. Abadlali bethu bafumene indebe futhi ibachulumancisile lo nto. Ibalulekile kuthi lo nto,” utshilo uComitis esamkele indebe yeMTN 8.

Nakubeni uMcCarthy eqokelele iindebe ezinkulu kwimidlalo emikhulu eYurophu esengumdlali – kodwa uvumile okokuba ebesoyika eMoses Mabhida.

“Le ndebe ibaluleke gqithi kum ngoba yeyokuqala,” utshilo uBenni. “Ndabethwa kwilinge lam lokuqala – kodwa ndaphumelela kwityeli lesibini. Xa usebenza ngokuzimisela, ufunda uphinde uhlalutye ngenyameko amaqela odlala nawo – soze singaphumeleli singabaqeqeshi abasakhulayo,” utshilo uBenni.