ZINTSUKU zine zokubhiyozela ubugcisa obuveliswa yiMpuma Koloni eMonti kule mpelaveki.
Oku ukuphathelwa yiEastern Cape Entertainment Stars Awards (ECESA) eza kuqala namhlanje uLwesine.
Ezi mbasa zibhiyozela abo benze umohluko kumacandelo ohlukeneyo ezobugcisa aquka ezemidlalo, usasazo lukanomathotholo, umabonakude, kwezomculo, kwiifilimu njalo njalo.
Amagama afana noZonke Dikana, Vusi Nova, Busiswa, Putco Mafani, Luks Gidane, Pastor Nozewu, Sithandiwe Velaphi ( I’solezwe) kwakunye negqala lentatheli uEric Naki – baphakathi kwabo batyunjelwe kumabakala ohlukeneyo obugcisa kula mawonga.
Umsunguli wala mawonga, uTazz Nginda, uxelele I’solezwe ngeentsuku ezine ze-ECESA.
“Siqala ngomdlalo wegolufa namhlanje (uLwesine, umhla we8 kweyeNkanga 2018) nalapho ikhulu labaqhokri begolufa baza kube bevan’ amandla, besilwela ibhaso lemali eEast London Golf Club.
“Oku kuza kulandelwa bubusuku beComedy kwanamhlanje (uLwesine) eOrient Theatre. Amaqhula athandwayo uMira, uMbathane, uShuz Sigobelwana, uKhanyisa Bunu, uSiya Seya noLoyiso Madinga – baza kutshintshisana ngeqonga.
“Usuku olukhulu lwangoLwesihlanu, umhla we10 kweyeNkanga 2018 bubusuku beembasa eThe Venue eHemingways. I-BET iza kube ibonisa ababukeli konke oku.
“NgoMgqibelo ukususela ngo12am de kube yintsasa yangeCawe – uJessica Mbangeni, uNaakMusiq, Sdudla noma1000, Sliq Angel, Betusile Mcinga, Mobi Dixon, MoonChild, Dumza Maswana, DJ Mfundisi, MXO, IFani noMajor League kulindeleke babelane ngeqonga kwiMusic Festival yeECESA.
ULungile Radu kwakunye noJessica Mbangeni kulindeleke babhexeshe umcimbi.
La mawonga aqalwa nguTazz Nginda ekunye noMandla Makwela ngo2016. “Eli qonga lenzelwe ukuqwalasela amagcisa asebenzayo kwaye likhuthaze nabo basakhulayo ukuba babeneenjongo eziphakamileyo,” kutsho uNginda.
Amatikiti aqala kwiR150 ukuya kwiR1000 iVIP eTicket Pro.
simphiwe.freddie@inl.co.za
UZizi Kodwa uncoma uDingaan Thobela owaphakamisa uMzantsi Afrika